Çadır kasabasında Hristozun duuması klisesindä geçti master- klas Paskellä yortusunnan baalı. Onu hazırladı ikona yazıcısı Kira Yayman.
Uşaklar dinnenmäk vakıdını faydalı geçirerlär. Master -klasta pay alannar üürendilär gipstan türlü gözellikleri yapmaa — tavşamcıkları, yımırta, ayozcukları. Sora onnar kendi ellerinnän hem kendi bakışına görä onnarı boyadılar.
«Bän pek sevdim, yapêrım kukumävu».
«Bän boyêêrım tavşamcı, savaşêrım. Beendim, meraklı».
«Bän boyêêrım yımırta, yardım ederim,pek islää, biz var geldik burayı».
«Benim adım Maşa, pek beendim ,hepsi pek meraklı, şindi gipsı dökecäm, ama taa karıştırêrım».
Uşakların anasının birisi nışannadı, ani lääzım onnarı küçüktän bölä zenginniklerä üüretmää.
«Uşaklar ruh zenginniklerini üürenerlär, kendi ellerinnän yapêrlar, pek beenerlär, bu pek önemni onnara deyni, onnar pek şen».
Kira Yayman gösterdi uşaklara kendi ikonalarını, annattı, ne o Paskellä hem neçin boyanêr yımırtalar.
«Uşaklarlan barabar döktük gipstan yımırta, uşaklar onnarı boyadılar, kimin nicä esabına Paskellä tematikasına, ayozcukları döktülär, boyadılar. Sevindilär, onnar baalıydılar işä, sayȇrım, ani ani bu pek önemni iş»,- Kira Yayman nışannadı.
Hristozun duuması adına klisesinin protoiereyi Sergey Veliksarov söledi, ani bölä olaylar pek faydalı uşaklar için.
«Annatmaa uşaklara, ne o Paskellä, ne o getirer,o büük baaşış bizä Allahtan. O bizim icin verdi kendi yaşamasını,ani herbir kişi, kim inanêr Hristoza, yaşasın»,- Sergey Veliksarov söledi.
Master -klastan sora herbir uşak aldı kendi yaptıı işini evä.
Avtor: A. Karapirä, operator hem montaj: L. Arfonos
Moldovanın hem Gagauziyanın en mekalı haberleri GRTnın Telegram kanalında!