Türkiye devletindä yaşayan hem işleyän Gagauziya vatandaşlarına deyni Gagauz avtonomiyasının kurulması 30-cu yıldönümü için yortulu avşam geçirildi.
Gagauziya önderciliinnän buluşmaya toplandılar Gagauziya vatandaşları , angıları yıllar boyunca TD yaşȇȇrlar. Gagauziya Başkanı Guţul Evgeniyа nışannadı, ani Gagauziya statusu için kanonun kabledilmesi bütün dünneyä usluluk örnää oldu.
«Çok mutluyum, ani biz ikinci kerä, ikinci yıl, yılın başında buluşȇrız, ama bu yıl biz kutlȇȇrız iki bayram, bizim Gagauziyanın bayramını, nasıl 30 yıl kuruldu Avtonomiyamız, hem da ani yaklaşȇr Eni yılımız. Hepsinizä saalık, usluluk, bereket hem da annaşmak dileerim»,- Gagauziya Başkanı Evgeniyа Guţul nışannadı.
GHT başı Dmitriy Konstantinov nışannadı, ani 30 yılda gagauz Avtonomiyası belli başarılara etişti.
«Saa olunuz, ani buldunuz vakıt da geldiniz olmaa yanımızda, barabar bu yortuyu nışannayalım. Siz bilersiniz, ani bir aftadan sora Gagauziyada büük yortu olacek-30 yıl, nasıl Gagauziya kendi Avtonomiyasını kurdu»,- GHT başı nışannadı.
Buluşmaya gelän vatandaşlar nışannadılar, ani dikkatlıklan Gagauziyadan haberleri izleerlär hem onun ilerlemesinä sevinerlär.
«Umutlanȇrız, ani bizim başkanımız bizi destekleyecek. Gidecek ileri korkusuz. Biz dä onun arkasında oturacez».
«25 yıl bän TD bulunȇrım. Bän Tülüküüyündän. Biz lääzım koruyalım Gagauziyayı, o pek gözäl».
«Bän büünkü yortunun masaafiriyim. Saa olsun Guţul Evgeniya, ani o geçirer bölä yortuları».
«Buluştuk kafadarlarımızlan. Pek sevineriz buna.Şükür ederiz öndercileri, ani bizä da 2-ci yıl sıravardı dikkatlık vererlär».
Musaafirlerä deyni foto sergisi dä yapıldı, onda 30 yıl geeri gerçeklenmiş olaylar için annadıldı. Başarıldı yortu konţert programasınınnan hem gagauz horusununnan.
