Oktäbrinin 29-da Komratta nışannadılar 101-cı yılını, nicä Türkiye Respublikası kuruldu. Olayı, angısına teklif edildilär primarlar, deputatlar, Bakannık komitetin temsilcileri hazırladı Türkiye Devletin Genel Konsullu Komratta. Olay çeketti Turkiye Moldova hem Gagauziya gimnalarlan.
Türkiye Devleti Genel Konsulu Komratta Adnan Hayal şükür etti hepsini katılmak için yortulu olaya. O nışannadı, ani geçti 101 yıl o gündän, açan türk halkın istoriyasında eni sayfa açıldı. Mustafa Kemal Atatürk oldu Türkiye Respublikası ilk Prezidendi .
«Respublikanın haberlemesindän sora büünkü günädän 101 yıl geçti.Bu yılların içindä bizim devletimiz türlü zorluklarlan karşı karşıya geldi. Ama bizim büük liderimiz Mustafa Kemal Atatürk çizmiş olduu yolda, devletimizin hem dünnedä annaşmak hem raatlık korucusu hem kolaycısı olmuştur»,- Türkiye Devleti Genel Konsulu Komratta Adnan Hayal nışannadı.
Büün Türkiya ii cümna hem soţial ekonomika tarafından ilerleyän devlet, angısı yardım eder başka devletlerä dä, angıların arasında Moldova da bulunȇr, urguladı Adnan Hayal.
«Moldova Respublikasınnan 2018 yılında strategiya uurunda ortaklık deklaraţiyayı imzaladık. Strategiya ortaklıımız aramızdakı baalantılarımızın taa da artmasına getirdi. Her zaman hem herbir ortamda gagauz soydaşlarımızın Moldova Respublikasınnan ilişkilerdä çok özel bir eri vardır»,- çizgiledi konsul.
Gagauziya için Türkıye devleti dost hem yardımcı kultura, üüretim, soţial hem ekonomika proektlerin yapılmasında, nışannadı Türkiye Devleti Genel Konsulu.
«Bu proektlerin sayısında Gagauz Eriylän birliktä hepsi Moldova vatandaşlarına hem Moldova Respublikasına kalkınmasına katkı vardır.Turkiye Respublikasınnan Gagauz Erindä gerçekleştirilmiş proyektleri her erdä var nicä görmää, angı küüyä dä, kasabaya gidin , TİKAnin kardaş primariyaların yapılmış proektlärlän karşılaşırsınız»,- ekledi o.
Türkiya Devletin yaşayannarını yortuylan kutladı devletin Prezidenti Recep Tayyip Erdogan kendi video mesajında.
«Türkiyedä hem yurt dışıında yaşayan hepsi vatandaşlarımız Respublika kurulması yortumuzlan bütün candan kutlȇȇrım. Turkiye Respublikasının 101 yıldönümü kutlu olsun»,- kutlamaklarlan Türkiye prezidenti danıştı.
Olayda, angısı adalı Turkiye Respublikasının 101-ci yıldönümünä iki uçak biletin lotereyası yapıldı. Bundan sora musaafirlär daadabildilär türk imeklerini.
