Noyabrinin 8-dä, Ayoz Dmitriy Solunskiy günündä Svetlıy küüyün yaşayannarı küüyün kurbanını baktılar. Klisedä yortulu liturgiya geçti. Geçirdi onu protoierey Mihail Kaledji. Ona yardımcı oldu Kazayak küüyün Ayoz Görgiy adına klisesinin din izmetçisi Andrey Mihu. İnsannar toplandılar Allaha birliktä dua etmää. Herbiri kendi dualarında saalık, uygunnuk hem usluluk istedi. Kutladılar küüyün yaşayannarını bu büük yortuylan Gagauz Erin öndericileri dä.
Sabaalendän insannar biri-biri ardına kliseyä gelmää başladılar yortulu liturgiyaya katılmak için.
«Hepsinä kısmet dileerim. Saalık olsun. Uygun yaşamak. Hepsimizdä hepsi islää olsun. Annaşmakta yaşayalım. Hepsinin canında büük inan Allaha olsun».
Kliseyä gelennerin arasında komuşu küüyün, Kongazın yaşayannarı da vardı.
«Bu kliseyi pek benerim. Burada pek islää din izmetçileri. Pek islää insannar. Hepsi cana yakın. Hepsinä saalık dileerim. Er üzündä usluk hem annaşmak olsun. İnsannar saalıkta yaşasınnar».
«Ko Alla yardımcı olsun. Ko dünnedä usluluk olsun. Hepsini bu yortuylan kutlȇȇrım».
Bu Sasov aylesi. İrinanın hem Aleksandrunun üç uşaa var. Mariya, Aleksandr hem 6 aylıcak Dmitriy. Büük gündä kliseyä birliktä geldilär.
«Saalık olsun, usluluk. Alla herzaman yardım etsin. Ko kliseyä taa çok kişi gelmää başlasın. Usluluk için dua etsinnär. Çünkü vakıtlar pek zor. Saalık hepsinä dileerim».
Yortulu liturgiyada Gagauz Erin öndericileri da bulundular. Başkan E.Guţul kutladı Svetlıy küüyünün yaşayannarını küüyün kurbanınnan hem diledi, ki onnar herzaman ruh uurunda sıkı biri-birinä baalı olsunnar.
GHT başı D.Konstantinov çizgiledi, ani kuvetlär avtonomiyanın iilii için çalışȇrlar, hem ani onnara insannarın yardımı lääzım, «cümnä birliktä yaşarkan işlär taa hızlı ilerleyeceklär» — çizgiledi spiker.
Svetlıy küüyün Ayoz Dmitriy adına klisesi 2007 yılda kaldırıldı. O Moldovanın en gözäl kliselerin sayısına girer. Bu yapının özel arhitektura stili. Anılȇr o horunnan da. Bu insannarın sesleri hem din türküleri, klisedä bulunannara raatlık hem sevinmelik duygularını baaşlȇȇrlar.
Svetlıy küüyün başı İvan Marçenko söledi, ani bu küüdä cana yakın hem iilikçi insannar yaşȇȇrlar.
«Saalık, kısmet, uygunnuk hepsinä dileerim»,- dedi primar.
İvan Marçenko söledi, ani kuvetlär küülülär için taa islä koşulları kurmaa çalışȇrlar. En ilkin primariya yaşlı insannara yardımcı olmaa savaşȇr.
«Bu bizim borcumuz, çünkü bu insannar bizim küüyümüz ilerlesin deyni çok işledilär»,- ekledi o.
Svetlıy küüyü 1913 yılında kuruldu. Onun ilk adı «Eni Deneviţa». Sora, 1950 yılında, o şindiki adını kabletti — Svetlıy oldu. Büünkü gündä o komuna, çünkü onun sayısına Alekseevka küüyü da girer.
