«Studentlerär bașarılı yolda: karyera, başarılar hem lääzımnık» — bu tombarlak masanın teması, angısı geçti Komrat devlet universitetindä. Burada toplandılar diil sadece studentlär hem üüredicilär, ama Gagauziyanın anılmış artistleri dä, angıları başardılar bu üüretim kurumunu. Toplantının neeti – becermeklerinnän paylaşmaa, eni baalantıları kurmaa hem tanıştırtmaa studentleri incä zanaatların özelliklerinnän.
Bulușmaklar, neredä bir masada toplanȇrlar studentlär, üüredicilär hem incä zanaatların uzmannarı çok önemli, çizgileеr Komrat devlet universitetin Kultura hem İncä zanaat kafedrasının başı Tatiyana Şögoleva. Butakım olayların neeti terbietmää gençlerdä sevgi incä zanaatlara, yaradıcılaa hem zenginnetmää studelerin becermeklerini.
«Bu toplantı oldu agitaţiya gibi, ko gençlär gelsinnär üürenmää KDU-nä. Biz herzaman butakım toplantıları, tombarlak masaları düzeriz, dä savaşȇrız buluşmaa uşaklarlan neetlän onnar olsunnar bizim studentlerimiz. İsteeriz gençlär üürensinnär ne o bizim universitetimiz, nesoy bilgileri burada var nicä kabletmää hem bilsinnär, ani o en ii devlet universitetliren birisi»,- çizgileеr Şögoleva.
Büünkü gün fakultenin başarannarı oldular anılmış artistleri. Onnar paylaştılar, ani herzaman hoșlu hem sıcak duygularlan dönerlär bu üüretim kurumuna. Gagauziya artistleri çizgilerlär, ani önemni paylaşmaa kendi bilgilerinnän gençlärlän, kurmaa eni tanışmakları hem koorumaa balantıyı universitetlän, angısı destekledi onnarı profesional yolda.
«Büünkü günä bizim artistlarımız, şannı uzmannarımız gösterelär kendi örneklän, nekadar ii var nicä ilerlemää profesional kariereda, göstererlär gelän boylara, ani var nedän başlamaa hem var nereyi ilerlemää»,- deer artist Vasiliy Vasilioglo.
Marina Kıssa, KDU-nin başaranı, nışannȇȇr: «Önemni bizim gençlerimiz istesin hem kabletsin üürenmäk, çünkü inanȇrım, ani onnarım yaşamasında o yardım edecek hem destek gibi olacek. O onnara bilgi hem kendinä inan verecek, yardım edecek kendini açıklamaa. Açan bilgilerin var taa kolay bulmaa hem annamaa kendini».
Kristina Zagorodniy, KDU-nin başaranı, söledi: «Bu gün KDU—in tombarlak masasında toplandık. Bulunȇrım burada benim kollegalarımnan, angılar üürendilär Universitetin Kultura hem incä zanaat kafedrasında. Bu lääzımnı bir toplantı, çünkü burada bilgilärlan hem becermeklerimizlän paylaşȇrız. Bu gün burada bulunmak bana deyni hem benim kollegalarıma deyni büük bir mutluluk sem sevinmelik».
Nışannayacȇz, ani Komrat Devlet Universitetin Kultura hem Incä zanaat kafedrası işleer 1992 yıldan.
