Stepan Kuruglo adına gimnaziyasında şiir okumakları geçirildi.Yortulu olay Stepan Stepanoviçin 85-çi yıldönümünä adlandı. Onda üürenicilär, üüredicilär, Mariya Maruneviç adına Bilim merkezin hem KDU uzmannarı pay aldılar.
Yortulu olay gimnaziyanın muzeyindä geçti. Musafirlerä üürenicilär tanışmak ekskursiya yaptılar. Evelki rubalar, ev tedarlıkları, anılmış Gagauziyanın insannarına adalı sergilär burada erleştirili. Büük baş hem maaza gagauz adetlerinä görä tertipli. Bölä atmosferada Kuruglo Stepan Stepanoviçin şiirleri öttülär.
Jüri azaları –bilim insannar, yazıcılar, sairlär, üüredicilär sesledilär avtorun yaratmalarını. Hepsi üürenicilerä üüsek nota koydular hem onnarı ödülledilär.
«Biz pek severiz, ani siz gözäl hazırlandınız, da ölä şıralı ana dilimizdä Stepan Stepanoviçin şiirlerini okudunuz. Elbet, bizim için, Bilim-Aaraştırmak merkezi için bu pek önemni, açan siz lafedersiniz ana dilinizdä»,- nışannadı İrina Konstantinova, M.Maruneviç adına Bilim-Aaraştırmak merkezin başı.
«Beendim hepsiciini, ne var sizdä. Türlü paalı işleri ,ani toplamışınız — onnarı sade koruyalım. Hepsi uşaklar tekstleri islä üürendilär, duygulu intonaţiylän annattılar»,- sayȇr İvanna Bankova, üüredicisi, filologiya doktoru.
«Komisiya azaları pek sevindi, ani siz mıkaet olȇrsınız lafetmää bizim dilimizdä. Dildä lafedilmärsä-dil unudulȇr» ,- nışannȇȇr Pötr Çebotar, yazıcı.
«Uşaklar ölä gözäl annattılar, ani onnar havez verelär bana taa da çok yazmaa. İleri dooru var, kim okusun hem annatsın»,- sayȇr Aleksandra Kristova, aaraştırıcı.
«Sizin arifliiniz, girginniiniz git -gidä taa pek kızışsın, da yakınnarda Stepan Kuroglo adına gimnaziyasında filizlenecek genç yazıcılar»,- dedi İrina Rişelän, M. Maruneviç adına BAM uzmanı
Gagauz dili üüredicisi Vera Arakelän nışannadı ,ani hepsi üürenicilär büük havezlän yortulu olaya hazırlandılar.
«Bizdä, okulda, barabar Bilim-Aaraştırmak merkezinnän geçer yortular. Bu gün onnar jüri azaları oldular. Uşakları sesledillär hem metinnedilär»,- nışannadı Vera Arakelän,gagauz dili üüredicisi.
Fevral ayında Stepan Kuruglo adına gimnaziyasında tombarlak masa geçirilecek.Üürenicilerä, kim Stepan Stepanoviçin 85-çi yıl dönümünä şiir yarışmasında 1-3 cü erleri kazandılar, baaşışlar verileceklär.
Avtor: N. Jelezova, operator: V. Kıssa, montaj: M. Kazaku