«TAUR» futbol klubun sportçuları kablettilär eni formayi. Sponsorlarlan oldular analar-bobalar, angılar istedilär sevindirmää uşakları hem vermää onnara motivaţiyayi ileriyadooru futbollan zanaatlanmaa.
Gagauziyada türlü sport ţeşitleri ilerlerlär. Birisi onnardan futbol. «TAUR» futbol klubun sportçuları diil çoktan Bulgariyada yarışlarda pay aldılar, neredä üçüncü eri kazandılar. Tutturȇrlar genç sportsmenneri analar-bobalar. Bunun için istedilär uşaklara eni formayı başlamaa.
«Biz fanzonasına gireriz. Herbir oyuna geleriz. Herbir uşaan adını bileriz, gideriz hepsi turnurlerä. Bulgariyaya iki sıra gittik, orada uşaklar kendilerini gösterdilär. Onnar ii çıkışları kazanȇrlar. Biz istedik onnara baaşış yapmaa da sport formasını başlamaa. Bu formaylan biz isteeriz uşaklar başarları kazansınnar, ensesinnär. Biz sevineriz, ani bizim uşaklarımız futbola gezerlär»,- dedi ana Viorika Satirova.
«Biz sevineriz, ani uşaklar evdä telefonnarda durmȇȇrlar. Onnar komanda ruhunu terbiederlär, fizkultura tarafından ilerleerlär hem da savaşȇrlar lider, hem başarılı olmaa. Bu pek önemni şindiki vakıt»,-çizgiledi Elizaveta Arnaut.
«TAUR» futbol klubun trenerı Nikolay Sarioglo nışannadı, ani futbol komandası islää kendisini gösterer hem şükür etti anaları- bobaları tutturmak için.
«Bän düşünerim, ani bölä momentlär var nasıl çıkışları taa ii yapsın hem uşakaların gözlerindä ateş tutuştursun, da onnar istesinnär futbola gezmää, onnar görsünnär, ani var çıkışlar»,- sayȇr Sarioglo.
Uşaklar, angıları «TAUR» futbol klubuna gezerlär nışannȇrlar, ani beenerlär futbolu hem isteerlär ileriyadooru da oynamaa. Burada onnar komanda ruhunu duyȇrlar hem var kolaylıklar sportta kendini göstermää.
«Futbola edinci yıl gezerim. Onu severim, da bu oldu yaşamanın önemni payı».
«Severim futbolu. Severim meydana çıkmaa toplan oynamaa, onu kontrol etmää».
«Futbol interesli oyun, komandalı oyun. Beenerim, ani var nasıl komandaylan oyunamaa, ama diil biri-birinnän nicä başka sportta. Hem bizim devletimizdä var nasıl islää futbolcu olmaa».
«Bu benim sevgili oyunum, küçüktän däduylan futbol oynardım».
«Küçüktän futbolu severim. Bakardım hepsi oyunnarı, da düşündüm, neçin bän da oynamayım futbol».
«Küçüktän futbolu severim. Bobam gösterdi oyunnarı, bän beendim da istedim futbol oynamaa».
«TAUR» futbol klubuna türlü yaşlara görä 180 uşak gezer.
