Büün, mayın 28-dä Komratta sınır askeri veterannarı toplandılar. Onnar geridä kalan asker günnerini aklına getirdilär, anmak taşına, ani burada koyulu, çiçek koydular. Katıldılar bu olaya Gagauz eri Bakannık komiteti hem Halk topluşu temsilcileri hem dä cümnä izmetçileri. Onnar kutladılar sınır askercilerini yortuylan hem şükür ettilär, ani vatanın sınırlarını korudular.
İvan Tarlev — Gagauz eri sınır askerlerin arasında en büük. 83 yaşında. May ilk geldi. Susarak anmak taşına yaklaştı, çiçek koydu. Her yıl bunu yapȇr. Aklından asker yılları hem dostları hiç çıkmȇȇr. Çünkü o yıllar onnar omuz-omuza Ana topraklarının sınırlarını korudular.
«Kitelimi 63-cü yılda seftä giidim. Fevralin 23-dä. Askerciliimi Temrük hem Adler araları sınırında götürdüm. Şükür Allaha, ani büün dä burada buluşȇrız sınır askerlerinnän»,- söledi İvan.
Bu gün hepsi sınır askerleri için pek önemni. Çok yıl artık geçti, ama dostluk baalantılarını koruyȇrlar. Dostluk baalantıları için söledi Aleksandr Avramov: «Bütün yıl bu buluşmayı bekledik. Zorluklarımızı annadacȇz, geridä kalan yılları aklımıza getirecez. Nicä askercilik ettik. Nicä Vatanımıza borcumuzu verdik».
«Hodullanȇrız, ani sınır askerlerindä askercilik ettik», söledi Gagauz Eri sınır askerkeri asoţiaţiyası başı İvan Perepeliţa. Ecel ölä kudurdu, ani o kendi duuma gününü sınır askerleri günündä bakȇr.
«Sevinerim, ani maasuz bu gündä beni anam duudurdu»,- nışannadı İvan.
İvan Perepiliţa askerciliktän sora aylä kurdu. Üç ool terbietti. Şindi unukalarını doorulukçuluk prinţiplerinä görä büütmää yardım eder. Gagauz Erindä yakın 3,5 bin sınır askeri veteranı var. Hepsi onnar elbetki bu gündä anmak taşına gelämedilär. Kimileri kendi küülerindä kasabalarında toplanıp, bu günü baktılar, öbürleri sä aşırı devletlerdä bulunȇrlar. Geografiyaları pek geniş. Ama biri-birini unutmȇȇrlar. Sık baalanȇrlar, lafederlär. Hem dä mutlak bu gündä — kutlamak için.
«Noyabırsktän asker dostlarımız. Kutlȇȇrlar bizi. Biri-birimizi kaybetmeeriz. Büün erken sabaalendän beeri baalanȇrlar bizimnän. Telefonumun akamulätoru tezlää sünecek»,- ekledi Perepeliţa.
Kutladı sınır asker veterannarını Gagauz Eri Bakannık komiteti hem başkan işleri bakanı İvan Kolioglo: «Şükür ederiz, ani Vatanımızı korudunuz».
İvan Kolioglo sınır askeri veterannarın birkaçına Bakannık komiteti adından “Gagauz Yeri — 30 yıl” medalilerini verdi. Kutladı veterannarı Halk topluşu deputatı N.Dudoglo da.
«Sınır askeri olmaa deyni en ii genç olannarı seçärdilär. En iileri, en girginneri, en arifleri»,- nışannadı Dudoglo.
Cümnä izmetçisi M.Vlah söledi, ani büün dä askercilär Vatanıänı koruyȇrlar. O şükür etti herbirini.
«Büün dä genç askercilär Moldovamızı koruyȇrlar, küçük Gagauz Erimizi koruyȇrlar. Onnar bizim vatanımız»,- Mihail Vlah çizgiledi.
Sınır askeri veteranı, teatru aktöru, peetçi İlya Hadji bu günä adalı şiirini okudu.
«Пусть служба тяжела, сжимая автомат
На фланг ты выдвигаешься солдат.
Погранзастава, там братья все
Там нету «Я», там все родные, соратники, друзья»,- İlya Hadji.
«Bu buluşmalar herkeret sıcak atmosferada geçerlär. Geçmişi aklımıza getireriz, onnarı, kim artık aramızda yok», — söledi sınır askeri veteranı, ani Afgan cendindä pay aldı Saveliy Kreţu. O Komrada Belţ kasabasından geldi.
«Bu gündä duygularım karışık. Vatanımızın sınırlarını koruduk. Cenk ettik. Hertülü oldu. Şükür, ani büünkü gün saayız»,- urguladı Kreţu.
Komratta sınır askeri veterannarı adına anmak taşı 2018-ci yılda koyuldu.
Moldovanın hem Gagauziyanın en mekalı haberleri GRTnın Telegram kanalında!