Kanona görä, açan dışarda hava temperaturası kalkȇr 30 gradustan taa büük, ekonomika agentleri lääzım kursunnar zaametçilerä saalıı korumak için koşulları. Çalışannara sıcak havada lääzım verilsin su hem çalışmak vakıdın zamanı iisilsin.
Devlet iş ministerliin çalışanı İgor Çiloç «Ekonomika agenti» lääzım belli etsin çalışannara deyni odaları, neredä uygun temperatura. Bundan kaarä insannara gündä 2-4 litra su lääzım verilsin.Lääzım azaltma iș vakıdını hem sıralamaa çalışmak hem dinnenmäk zamanı. Agrariy Sergey Gonçar annatı, nicä onun kurumunda açık güneştä çalışan işçilerin hakkları esaba alınȇr.
«İlk, biz yaptık ölä, ki işlämesin tehnika, angısında yok kondiţioner sistemаsı, kurduk saalıı koorumak koşulları. Ikinci, odalarda koyduk buz dolapları sıcak hem suuk suylan, ișçilär alsınnar kendinä seerin yada sıcak su. Üçüncü, biz may hepsi obyektlаrdа koyduk kondiționerları. Hem, bundan kaarä, instruktaj yapȇȇrız, ani taa çok su lääzım içmää, eer nașeysa olursa, çekmää insanı gölgeyä, vermää dinnenmää biraz hem çarmaa hızlı mediţina yardımını»,- dedi çiftçilik kurumun bașı Sergey Gonçar.
Doktorlar nışannȇȇrlar, ani sıcak havalarda bolniţaya düşän innsannarın sayısı gün çarpması simptomnarınnan büüyeer.
«İsterim sölemää, ani bu vakıdın içindä, açan biz duyduk bu anomal sıcaklıı insannarın danışmanları büüdü 25%-dan»,- söledi doktor Vera Gerçu.
Önemni, ani iş verän insannar hem çalışannar dikkat olsunnar hem esaba alsınnar hepsi lääzımı koşulları, angılar yardım edecek koorunmaa gün çarpmasından, söleerlar doktorlar. Onnar nasaatlȇȇrlar almaa esaba o devletlerin praktikalarını,neredä sıcak hava o normal.
«Bugün buna dikkat olmaa lääzım.Hem savaşmaa yapmaa hepsi işleri sabaalen erken, açan temperatura ii. Alalım örnek gibi Kazakistan, Uzbekistan devletlerini, onnarın insannarı herzaman bu sıcaklıkta yaşȇȇrlar. Orada insannar çalışȇȇrlar sabaalen saat 6-dan saat 10-dan, sora onnara dinnenmäk vakıdı veriler, da avşamnän saat 5 onnar genä çalışmaya alınȇrlar»,- nışannadı doktor.
Moldova kanonuna görä, ekonimika agentleri, angıları sıcaktan koorumak koşulları saymȇrlar var nicä 20 bin ley ceza kabletsinnär.
«Cuvapçı poziţiyalarda bulunan iş verän insannar var nicä kabletsinnär ceza 5.000-10.000 lei, üridik kurumnarı sa kabledeceklär ceza 12.500-20.000 leyä kadar. Bölä, iş verennerä hem ekonomika agentlerinä sankţiyalar var nicä olsun. Bir çalışanın haklarına karşı gelärseydilär, o yakışȇr danışsın Devlet iş koşulları konrol etmäk inspekţiyasına, angısı İş ministerlinnän birliktä işleer hem kontol eder hepsi olayları, neredä insannarın hakları esaba alınmȇr» — dedi Igor Çiloç.
Devlet gidrometeorolojik kurumu nışannȇȇr, ani gelän vakıtta avtonomiyada hava sıcaklıı +33 — 36°C gradus kuracȇk.
