Gagauziyanın edi okulunda yısıtmak sistemalarına modernizaţiya yapılȇr. Onnarın arasında Komrat kasabasının Dmitriy Karaçoban adına liţeyi dä. Gagauziyanın başkanı Evgeniya Guţul dolaştı bu üüretmäk kurumunu da baktı, nicä yapıldı infrastruktura proekti.
Gagauziyanın üüretmäk kurumunarında üüretmäk koşulların taa ii yapılması- region kuvetlerin önemni davası. Örtülerin rekonstrukţiyası için 16 okulunda 2023-cü yılda verildi yakın 42 million ley. Ama yısıtmak sistemanın diiştirmesinä edi okulda yakın 4 million. Dmitriy Karaçobanın adına liţeyin örtü diiştirmesinä Bakannık komiteti verdi yakın iki million ley, ama yısıtmak sistemasının eniletmesinä 900 bin leydän zeedä, haberledi Gagauziya Başkanı Evgeniya Guţul.
«Biz bileriz,ani hepsi üüretmäk kurumnarında yısıtmak sistemalar eski hem prost durumda. Kimilerdä onnarı diiştirmedilär taa o vakıttan, nicä şkolalar yapıldılar hem açıldılar. Bunun için bu işlerä çok er vereriz. Bu liţey bir, angısı yısıtmak vakıdına hazır. Eni yısıtmak sistema konuldu. Kabinetlerdä sıcak hem uygun»,- dedi başkan.
İşlär yısıtmak sistemasının diiştirmesindä çekettilär oktäbr ayın sonunda. Da bir ayın içindä bittilär, liţeyin başı Mariya Angelova söledi:«Bir ayın içindä yaptık hepdi işleri. Da yısıtmak sezonun çeketmesindä sistema işleer. Şkolada sıcak, aydınnık, uygun. Uşaklar gelerlär ilin giimni hem da islää kendilerini duyȇrlar».
Yısıtmak sistemasını diiştirärdilär üüretmäk proţesin vakıdında, ama bu dolaştırmadı ne üürenicileri, ne da üüredicileri.
«Biz islää işlärdik, makar ki da yısıtmak sistemasını diiştirärdilär. Ama işçilär gecä çalışardılar. Onnar gelärdilär açan biz gidärdik. Sabaaylen herersi paktı, sıcaktı hem topluydu. Hepsi islää oldu. Da şindi sıcak. Uşaklar gölmekçä gezerlär, çok saa ol».
Moldova üürenmäk için milli programasına görä üüretmäk ministerlii satın aldı avtobusları okullar için. Birisi onnarda verildi D. Karaçoban adına liţeyinä. Onu avgust ayında verdilär, ekledi başkan.
«Neçin biz ayırdık bu liţeyi? Neçin ki burayı gelerlär uşaklar komuşu küüyülerdän. Da uşaklar kendilerini raat duysunnar kabledildi karar barabar üüretmäk bakannıklan vermää avtobusu bu liţeya»,- nışannadı Guţul.
Üüsek uurda üüretmäk proţesi geçsin deyni hem uşaklar kaliteli biilgileri kabletsinnär ileriya dooru da lääzımnı koşullar kurulaceklar , nışanandı Gagauziya başkanı: « Biz herzaman savaşacȇz yapmaa hepsini, ki uşaklarda islää koşullar olsunnar. Herzaman yanında olacȇz. Bizim avtonomiyamızda en akıllı hem islkää uşaklar».
Büünkü gün Dm.Karaçoban adına liţeyinda 26 klas işleer, ama üürener orada 680 uşak.
