Gagauziyanın iki şannı artisti Lüdmila Tukan hem Valentin Ormancı «Gagauz erim» eni türküsünä video çıkarȇrlar. Yaradıcılık işini türkücülär Duuma erin 30-cu yıldönümünä çıkaraceklar. Türkü regionun istoriyasına hem gözäl geleceenä adȇȇrlar.
Lüdmila Tukan hem Valentin Ormancı eni duȇt türküsünü patriotika temasına hem Vatanına başlȇȇrlar. «Gagauz erim» türküsü Gagauz avtonomiyasının tombarlak datasına adanȇr. Duȇt yaratması Duuma erimizin kuvedini hem halkın Vatanına baalantısını açıklȇȇr. «Var olan sıralar duyguların derinniini göstererlär, açan evä gelmää isteersin, havezin incäzanaatına döner, angısı akıla getirmeklerin sıcaklıını koruyȇr»,- söleer Valentin Ormancı.
«Geçän yıl bir ara Rusiyada yaşadım. Evä pek çekärdi. Döndüynän laflar kendileri döküldülär. Sora muzıka peydalandı. Çalarkana onu, Lüdanın sesini uygun buldum. Teklif ettim birerdä çalalım, o da kayıl oldu»,- ekledi Valentin.
«Patriotika türküleri özel eri benim türkücülüümdä kaplȇȇrlar. Valentin, açan teklif etti duȇtlan türküyü çalmaa, havezlän kayıl oldum»,- annattı Lüdmila Tukan.
Аrtistlär söleerlär, ani bu proektä katılmak – o diil sade yaradıcılık sırası, ama taa kolaylık halkımızın varlıı hem adetleri için şükür etmäk. «Gagauz erim» türkünün laflarını hem muzıkasını Valentin Ormancı yazdı, aranjirovkayı muzıkacılar Rusiyadan hem Gagauziyadan kurdular.
«Valentin Ormancı lafları yazdı. O da kompozitor. Arancırovkayı Moskvadan Denis Yasük hem gagauz çalgıcısı Vasili Dragan yaptılar»,- söledi Lüdmila.
Herbir sıracıı – o can erin baarması hem çaarışı. Tekstin maanası duygularlan doldurulu, söleer Valentin.
«Benim bakışıma görä, laflarda büük sevgi Vatanımıza açıklanȇr. Ko bu türkü baaşış olsun Gagauziyanın hepsi yaşayannarına deyni»,- sayȇr Valentin.
Lüdmila Tukan hem Valentin Ormancı gagauz türküsünä video çıkarȇrlar, angısı avtonomiyanın kuruluş gününä, dekabrinin 23-nä karşı çıkacek.
