Fevral ayın 7-dä anılmış Düz- Ava gagauz oyun hem türkü ansamblisinin kurucusu Semön Pometko 74 yaşında olaceydı. Kendi yaşamasını verdi gagauz folklorun ilerlemesinä hem toplamasına. Onun duuma günündä Düz- ava ansamblisi geçirer konţerdi, bununnan anarak maȇsrtoyu.
«Düz ava» halk oyun hem türkü ansmblisinin kurcusu Semön Pometko bütün yaşamasında korudu hem ilerletti halk adetlerini, terbietti sevdayi muzikaya, türkülerä hem oyunnara gençlerdä. Onun zaametlerin yardımınnan ansambl oldu bir büük aylä gibi , angısı savaşer korumaa gagauz halkın kultura varlıını.
«Düz ava» benim evim, ayläm, okulum, neredä bän büüdüm hem halk muzikayi sevdim».
«Düz-Ava o gagauz kulturanın simvolu , avtonomiyanın hodulluu. Onun büük hem uzun istoriyası var».
«Bu Gagauziyanın hem Moldovanın anılmış kolektivi. Biz büük hodulluklan tanıdȇrız bizim vatanımızı türlü devletlerdä».
«Bu legendalı bir kolektiv. Bu gagauz incäzanaatın temeli».
«Düz-Ava» bir köpru gibi oldu evelki vakıtlardan şindiki zamanadan da inanȇrız,ani gelecää da olacek».
Büün büük hatırlan anȇrız insanı, angısı braktı bir derin iz bizim halkın kulturasında hem istoriyasında, söleerlär artistlär.
«Gagauziya yaşayannarı için hem bizä deyni bu adet konţerdi. Bu pek önemni bir gün, neçinki ilk önderci Semön Vasilyeviç topladı bu kolektivi, hem verdi bir islää çeketmeyi»,- «D üz-Ava» ansamblisi artisti Evgeniy Üsümbeli söledi.
Maȇstroylan barabar işlemää – o kısmet. Da artistlär sıcaklan aklına getirerlär Semön Pometkoyu, angısı diveç yaşacek gagauz halkın kulturasında.
«Semön Vasilyeviç çok zaamet koydu gagauz kultura ilermesinä halk muzikasına. Bu konţert adalı onun anmasına» ,- nışannadı Andrey İvanov, «Düz-Ava» ansamblisi solisti.
Bitki yıllar kolektiv yaradıcılık uurunda büük başarlara etişti. Da yıl- yıldan kolektivä gençlär geler, söleer Düz-Ava ansamblinin artisti Natalya İofçu: «Sevinerim, ani o enilener. Biz, nicä üüredicilär, annȇrız, ani diil boşuna yaşadık hem işledik».
«Maȇstronun duuma günündä isteerim dilemää Düz-Ava ansamblisinin kolektivinä büük başarları yaratma yolunda»,- nışannadı «Düz-Ava» ansamblisi başı Tatyana Şögoleva
Semön Pometkonun yaratmaları yaşȇȇrlar gagauz halkın canında. Da bu kultura varlıı kalacek gelän evlad boyalarımıza.
