Şeker hastalıı olayları uşaklarda zeedelenerlär, nışannȇȇrlar uzmannar.
Şeker hastalıı-insanın güüdesindä elementlär diişilmesininnän baalı. Bu hastalıklan insannar uglevodlu imekleri dikkatlıklan kullansınnar lääzım. Bu beterä onnarın kanında glükoza sayısı birdän üüselsin yakışȇr. Endokrinolog hem uşak doktoru Svetlana Tanasoglu annattı uşaklarda şeker hastalıın peydalanmak sebepleri için.
«Güç, ama şeker hastalıı sık var nicä uşaklarda, ölä da büüklerdä. Sayılar yıl yıldan zeedelenerlär. Uşaklarda taa sık karşı geleriz şeker hastalıın 1-ci soyunnan. Bu baalı insulinin etmemezliinnän»,- Tanasoglu annattı.
Svetlana Tanasoglu çizgiledi, ani uşaklarda şeker hastalıın peydalanması genetik hem yaşamak koşullarından çekiler.
«Uşaklarda hastalıın peydalanması genetik sebepindän olȇr. Biz bu işi analara raat annadȇrız, ani erken yada geç bu hastalık uşaklarda hep okadar peydalanaceydı. Kimisindä problema 3 yaşında belli oldu, kimisindä 18-25 yaşlar arasında. Hepsi çekiler yaşamak koşullarından hem imunitetin durumundan»,- Svetlana Tanasoglu çizgiledi.
Svetlana Tanasoglu çizgiledi, ani analar lääzım dikkat olsunnar, açan uşak çok su içmää isteer, uşaan yorgunnuu var.
«Eer siz esaba aldıysanız, ani uşak çok su içer, mutlaka bu iş dikkatlıınızı çeksin lääzım. İkinci erdä bulunȇr uşaan emoţional durumu. Eer o bitki vakıtlar pek sert kendisinä hem onunnan gerçeklenän işlerä dikkatlık verärsä»,- Svetlana annattı.
Gagauziya yaşayannarı kendi bakışlarını bu hastalaa açıkladılar.
«Bilerim, ani bu hastalık var, ama yoktur karşı geldim onunnan . İşitmedim, ani onunnan hastalansınnar benim senselelerim hem tanıdıklarım da».
«Dorudan sölediynen, oolum hasta».
«Bän bilerim, ani bu genetik hastalıı. Senselelerdä yoksa , uşakta da olmayacek».
Uzmannar nışannȇȇrlar, ani hastalıı vakıtlan bulmak hem ilaçlamak büük problemalardan korusun yakışȇr. Taa derindän hastalıktan korunmak hem onu ilaçlamak kolaylıklarını GRT kanalın “Puls” programasında siiredäsiniz yakışȇr.
Avtor: A.Terzi, operator: V. Кıssa, montaj: М.Кazaku