Gagauziyanın Seçim kodeksi için kanona diişmeklerini, angıların avtoru GHt başın yardımcısı Georgiy Leyçu, bakıldılar kanon organın oturuşunda.
Kanon proektin kabletmesinin lääzımnıı peydalandı o beterä, ani Gagauziyanın seçim kodeksi lääzım cuvap etsin avtonomiyanın Temel kanonuna, nışannadı GHT deputatı Vladimir Kıssa, angısı temsil etti diişmekleri seçim kodeksinä. O urguladı, ani benzeyän iniţiativa kabledildi altıncı çaarışın deputatlarınnan.
«Siz hepsiniz aklında tutȇrsınız, ne o sallangaç. Açan migraţiya bir küüyüdän başka küüyä hızlı diişer, neçin ki var kandidatlar angıları bakmayarak bişeya isteerlär seçimnerdä ensemää paraylan yada başka türlü- yazdırarak insannarı bir küüdän başka küüyä. Ama diil herzaman hepsi olȇr da kandidatın avtoritetı yardım etmeer. Olȇr ölä , ani bölä işlär konkurentä yardım ederlär. Bunun için hepsini kanonca lääzım yapmaa»,- dedi Kıssa.
Bıldır iyül ayında ilk okumakta kabledildi kanon proekti seçim kodeksinä diişmeklerin giriştirmesinnän baalı da o GHT üridik komisiyasında bulunȇr. Hepsini lääzımnı uura getirmää deyni lääzım hepsi diişmekleri sistemli yapmaa nışannadı deputat Aleksandr Dülger.
Aleksandr Dülger GHT deputatı nışannadı: «Lääzım açık yazmaa, ne o adminresurslar da var üridik komisiyasının teklifi taa açıktan bu annamayı belli etmää kimseydä olmasın kolaylık onu seçimnerdä kullanmaa, da seçimnär açık, dooru hem hepsi için birtürlü koşullarda geçsinnär. Bunun için teklif ediler yok etmää kararı 2023-cü yılın iyülün edisindän da onu vermää işlettirmeyä . Bu proekttä 103 diişmäk var».
Pek önemni bu kanon proektini kabletmää, ki deputatlar işlemää çeketsinnär da onu taa ii yapsınnar, GHT başın yardımcısı Georgiy Leyçu kendi kolegalarına danıştı: «Eer biz bunu şindi yapmarsaydık, ozaman çok vakıt kaybedecez. Bunun için teklif ediler kayıl olmaa da işlettirmää onu».
57-ci statyasına görä, eer sayıya konularsaydı birkaç kanon proekti, angıları baalı diişmeklärlän birtürlü kanonda, cuvaplı komisiyasının teklifinä görä var nasıl onnarı bir proektä baalamaa da ikinci okumakta bakmaa, nışannadı deputat Mihail Jelezoglo: «Var nasıl bizim komisiyanın gelän oturuşunda onnarı birleştirelim da bakalım, nesoy sa faydalı işleri, angılarını var nasıl almaa da şindiki iniţiativaya koymaa».
Teklif için çevirmää geeri kanon proektini 2023-cü yılın iyül ayın edisindän hem da kanon proektini işlettirmää taa islää hepsi deputatlar kendi seslerini verdilär.
