İlk keret Gagauziyada geçti Moldova sambo çempionatı kadetların arasında. Yarışmaklara 200-dän zeedä sportçu geldi bütün devlettän.
30 komandadan taa zeedä geldi Komrat kasabasına katılmaa sambo çempionatına kadetların arasında. Bu olay gösterdi, ani Moldovada sambo güreşi ilerleer üüsek uurda hem da sportçular isteerlär üüsek uurlara etişmää, nışannadı Benderı kasabasından dünnäarası davaacısı Sergey Sahov: «Güreşmeklär geçerlär ölä, ani ne Evropa, ne da dünnä çempionatlarında geçmeerlär».
Trenerlar da nışannȇȇrlar, ani onnarın terbiedenneri islää hazırlandılar da üüsek çıkışlara etişerlär.
«Moldova çemoionatı topladı en ii sportçuları, en ii güreşçileri respublikadan. Herbiri onnarda çempion regional yarışmaklarda ilkin kasaba uurunda ensedi sora da zonal, sora da düştü respublika çempionatına. Konkurenţiya pek büük, kimsey istämeer kendi güreşlerini ölä vermää».
«Güreşmeklär pek kaavi geçer. Hepsi sportçular ensemää isteer. Burayı geldi en ii güreşçilär, ii çıkışlarlan, kim Evropada güreşti, kim Moldova çempionu oldu. Onnar üüsek çıkışları göstererlär. Bizim Çeşmäküüyündän dä islää çıkışları göstererlär».
Sambo güreşçileri söleerlär, ani çok zaamet hem kuvet koydular, ki ensemää, neçinki soperniklär pek kaaviydilär.
«Büün soperniklär kaaviydilär. Çok becermek kazandım. Elbetki, zordu, ama başarlara etişmää var nasıl. Lääzım inanmaa hem da savaşmaa buna etişmää».
«Büün soperniklär pek kaaviydilär. İki güreş geçirdim da ensedim. Soperniklär kaaviydilär, hem isläydilär».
«İlk güreş zordu, ikinci taa ilindi. Aldım, sıbıttım da finala çıktım».
«Üçüncü eri aldım. İlk güreşi, yazık, tarattım. Ama ileri gideriz».
Bütündän Gagauziyadan sportçular 11 medali kazandılar. İlk oldular- Artöm Kiosa, Evgeniy Kovalji, Miloş Fırıma. Sportçu Kazayaktan Evgeniy Kovalji altın medaliyi kazandı, Aleksandr Taka gümüş. Moldova sambo çempionatı kadetların aralarında belli eder , kim Evropa çempionatına katılacek, angısı aprel ayında Kiprada geçecek.
Moldovanın hem Gagauziyanın en mekalı haberleri GRTnın Telegram kanalında!