Eni yıl yortularına karşı Kongaz küüyü 1-ci uşak başçasına «Russ masalı baaşış gibi» akţi̇yası geldi. Onun geçirenneri bu sıra «Terem, teremok» masalınnan uşaklara geldilär.
Russiya evi Moldovada Aleksandr Melniçuk kukla teatrusununnan barabar uşaklara spektakli gösterdi. Eni yılın baş personajı da Ayaz Dädusu baaşladı eni duyguları uşaklara.
«Büün Rossotrudniçestvo RF büük elçiliinnän barabar getirdi Gagauziyaya gözäl hem açık bir akţiyayı, angısının adı «Russ masalı baaşış gibi». Bu akţiyayı biz birkaç yıl sıravardı geçireriz hem Gagauziyaya onunnan geleriz. Ama bu yıl eni bir spektakl getirdik. Bu yıl biz geldik «Terem, teremok» spektaklisininnän. Bizä yardımcı oldular Aleksandr Melniçuk teatrunun aktörları. Bu spektakl interaktiv formasında geçecek, uşaklar yakışaceklar pay alsınnar onda. Gagauziyanın hem bütün dünnenin uşaklarına isteeriz dilemää saalık, kısmet, ko hepsi onnarda islää olsun, ko onnar Eni Yıl yortularını islää geçirsinnär, hem saalıklı olsunnar»,- annattı Andrey Metta, Moldovada Rossotrudniçestvo temsilcilii uzmanı.
Kongaz küüyü 1-ci uşak başçası öndercisi Sofya Grıu şükür etti musaafirleri uşaklara verilän dikkatlık için.
«İsteerim şükür etmää Rus evini Moldovada, ani geldilär bizim uşak başçasına da kutlȇrlar bizim uşakları Eni yıl masalınnan. Saa olunuz, ani gelersiniz, sevindirersiniz bizim uşakları. Bizim uşaklar pek sevinerlär, pek sevinerlär hepsi musaafirleräţ Onnar pek beenerlär bu gözäl yortuyu, nicä eni yıl. Onnar sevinerlär hepsi baaşışlara. Evä geldiynen da pay ederlär kendi sevinmeliini ana—bobalarlan hem kardaşlarınınnan»,- nışannadı Sofya Grıu.
Mari̇ya Duşkova 4 uşak anası annattı, ani̇ bölä akţi̇yalar pek önemni̇ uşaklara deyni̇, çünkü eni̇ yıla karşı herbi̇ri̇ bekleer büülü olayları.
«Büün bizdä bir yortu , çünkü biz beklemäzdik, ani bölä bir baaşış bizä gelecek. Bizä geldi rusların teatrusu. Biz çıktık onnara bir soruşlan, amma umut etmedik, ani onnar geleceklär. Onnar diil sade göstereceklär, amma lafedeceklär uşaklarlan. uşaklar buna pek sevinerlär. Bän şükür ederim bizim büünkü masaafirlerimizi»,- nışannadı Mariya.
Yortunun sonunda herbir uşak kabletti Ayaz Dädusundan tatlılık baaşışlarını.
Avtor: A. Terzi, operator: Gr. Stavilov, montaj: İ. Rezuneţ.