«Oyuncak» kukla teatrusu Gagauziyada ilerleder kendi işini, gösterip küçük siiredicilerä spektaklileri gagauz dilindä. Kıpçak küüyün 4-cü uşak başçasında «RIZ OTU» spektakliyi gösterdilär. Bu meraklı interaktiv teatru koyulması, angısı koyuldu Todur Zanetin pyesasına görä hem Födor Gaidarjinın muzikasına.
Spektaklinin çeketmesindän taa uşaklar meraklı masal dünnesindä bulundular. Gözäl resimni hem şıralı dekoraţiyalar, baş kahramannar, şen muzika — yapêrlar bu spektakliyi halizdän şaşılacek. Bu olay getirdi uşaklara çok şennik, gülümsemäk hem taa başka duyguları.
«Bän pek beendim spektakliyi. Pek beendim ayı. Spektakl pek şendi».
«Bän beendim spektakliyi. En çok beendiim kelebää. Pek şendi».
«Bän beendim spektakliyi. Orda çok türkü var. Bän beendim çiçekleri. İsteerim taa gelsin».
«RIZ OTU» spektaklisi o diil sıradan bir göstermäk — burada diri lafetmeklär gagauz dilindä, uşaklar cuvap ederlär kahramannarın soruşlarına. Nicä nışannadı rejisör Mihail Konstantinov bu derin maanalı masal, angısını uşaklar sevdilär.
«Spektakl koyuldu Todur Zanetin pyesasına gorä. Burada var ölä legenda rız otu için. Bizim dädular, babular bilerlär, ne o rız otu, gençlär bilmeerlär. вырезать Pek gözäl karşılȇȇrlar uşaklar, spektakl muzikalı, görerim, ani uşaklar annȇȇrlar gagauz dilini, cuvap vererlär, baalantı olȇr siirediciynän»,- nışannadı rejisör Mihail Konstantinov.
Kıpçak küüyün 4-cü uşak başçası rumın hem gagauz dilleri üüredicisi Lüdmila Todorova urguladı,ani pek önemni bölä spektaklilär uşaklara gagauz dilindä koyulsunnar.
«Pek önemni, neçinki uşaklar lääzım işitsinnär gagauz dilini hem gözäl örnek – bu teatru gösterileri. Biz sevindik, ani onnar bu gün geldilär bizä – uşaklar annadılar, sevdilär – personajlar pek şendilär, pek beendik, saa olsunnar, var olsunnar»,- Lüdmila Todorova urguladı.
«Oyuncak» kukla teatrusu Gagauziyanın taa başka küülerinä dä gidecek. Bu proekt aslıya çıkarılêr «MirkirAs» asoţiaţiyanın Moldovada işbirlii Şveyţariya bürosunun yardımınnan barabar Çadır muniţipiyasınnan.
Moldovanın hem Gagauziyanın en mekalı haberleri GRTnın Telegram kanalında!
Avtor: A. Karapirä, operator hem montaj: Leonid Arfonos