Gagauziya geçirdi bitki yola anılmış Gagauziyanın kompozitorunu İlya Filevı. Onu yaratmaları braktılar derin iz muzika kulturasında. Bitki yola geçirmäk ţerimoniyası gecti Komradın kultura evindä, nereyi geldilär onun hısımnarı, kolegaları hem onnar, kim bilärdi onu hem onun talantını hatırlardı.
Onun muzikası cannarı eridärdı,verärdi kuvet hem umut. Onun yaratmaları derin, duygulu hem özel stilli, onun kompoziţiyalarını var nasıl ilk seslerdän tanımaa. İlya Filev kendi yaşamasını muzikaya verdi. Kolegaları hem dostları anȇrlar onu, nicä becerekli, ama bununnan barabar da utancak bir insan gibi, angısı herzaman hazırdı yardımcı olmaa genç muzikacılara hem kendi becermeklerinnän paylaşmaa.
«Bana deyni o ikinci bobaydı. Açan benim bobam Dmitriy Peev öldü, kaldı İlya Filev. Onun yardımınnan bän muzika okulunu başardım. Bana zor sölemää, ama gitti bir epoha, gitti legenda büük bukvadan».
«Bana deyni o insan büük bukvadan. İi ürekli, şakacı hem da elbetki üüredici. O çok işlerä beni üüretti, açtı beni hem da onu ne bän kendi için bilmärdim».
Onun yaradıcılıı hem akıllıı kalaceklar onnarın cannarında, kim onu bilärdi hem sevärdi onun yaratmalarını. İlya Fileva verildi anılmış kultura işçisi adı, o kabletti «Maestru în Artă» adını. Bu taa bir keret gösterer onun büük zaametini muzika incäzanaat ilerlemesindä.
«Düşünerim, ani hepsimiz biz kısmetliyiz, ani yaşadık, soluduk hem yarattık bir vakıtta Filevlan. Elbetki, İlya İlyiç o epoha»,- «Düz-Ava» türkü hem oyun ansamblisinin başı Tatyana Şçögoleva nışannadı.
Bitki yola geçirmäk ţerimoniyası topladı bireri türlü sferalardan temsilcileri- muzikantları, incäzanaat uzmananrını, kompozitorun yaradıcılıını sevennerini. Salada ötärdi onun avaları, angıları oldular gagauz kulturasının varlıınnan. Moldova parlamentindä andılar maestroyu susmak minutasınnan.
«İlya Filev biliner, nicä bir becerekli hem talantlı kompozitorların birisi, angısı çok muzika şedevraları başladı. Ölä nicä KDU gimnası, Komrat kasabasının gimnası, Hederlez hem Merţişor halk yortuların gimnaları hem da uşaklar için türküleri. İlya Filev raametli oldu, ama bizim aklımızda o kalacek nicä becerekli insan, angısı kurdu zengin kultura varlıını da çok zaamet koydu gagauz halkın kultura ilerlemesinä. Saygılı kolegalar yalvarȇrım sizi anmaa susmak minutaylan maestroyu»,- yazdı Parlamentin deputatı İvanna Köksal.
Ilya Filevın yaşaması bütünnä muzikaylan baalıydı, onun avaları oldular gagauz klasikasınnan. Bitki yola maestruyu geçirdilär şamar düümeklerinnän. Onun muzikası ileriya dooru da ötecek, kalarak anmaklan büük ustacı için, angısı yaşadı hem yarattı insan için.
