«Demir yolu» devlet kurumu uzmannarı 6 aydan zeedä aylık kazanç paralarını kabletmedilär. Bu sebeptän onnar protestlerä çıkȇrlar. Protestlär Kişinöv, Belţı, Okniţa, Ungenı hem Besarabka kasabalarında geçtilär. Bu afta bu protestlerä «Demir yolu» Komrat stanţiyası uzmannarı da eklendilär.
MD «Demir yolu» kurumun uzmannarı protest akţiyaarını geçirerlär. Onnar annadȇrlar, ani 6 aydan zeedä ay kazanç paralarını kabletmeerlär. «Demir yolu» Komrat stanţiyası uzmannarı açıkladılar, ani ötää dooru bu işä dayanamayaceklar hem yalvarȇrlar devlet temsilcilerini çözsünnär bu problemayı.
«Neçin biz büün burayı çıktık? Ki görsünnär hem bizim paralarımızı bizä ödesinnär. Biz sade bunu isteeriz. Yaamur, kaar, biz iştäyiz, bizi sa sade adamaklarlan doyurȇrlar. Bän büün düşünerim, neredän ödünç almaa harçları ödemää deyni, bän yalnızım hem bilmeerim, nereyi gitmää hem kimä danışmaa. Kimä can acımı söleyim. Biz da birär buka ekmek, başkaları gibi, imää isteeriz»,- nışannadı «Demir yolu» Komrat stanţiyası uzmanı Nina Tanasoglo.
Uzmannarın laflarına görä, ay paraların yoksuzluu bütün ayleleri zor finans durumuna getirer. Çoyu lääzım olȇr yaşasın ödünç yada kredit para alarak. Kimileri her gün vereseyä tükennerdän imäk mallarını uşaklarını doyurmak için alȇrlar.
«Yaklaşȇrım insana da yalvarȇrım, ki o nesä makar imää versin. Uşaklar şkolaya nesoy gitsinnär? Yollamaa uşaa şkolaya yok neylän. Uşak yalvarȇr nesä vereyim, bän sä yok, ne vereyim»,- açıkladı «Demir yolu» Komrat stanţiyası uzmanı Vitaliy Marimoriç.
«6 ay paralarımızı ödämeerlär. Ne söleyim? Biz sade bir iş isteeriz, ko bizim kazancımızı bizä versinnär. Uşakları şkolaya lääzım yollayalım, studentlerimiz var, yok neylän ilaç almaa»,- nışannadı «Demir yolu» Komrat stanţiyası uzmanı Mariya Sırbu.
«Vardır 2,3 ay vermedi̇ilär paramızı, ama 6 ay -bölä taa görmedi̇m şi̇ndi̇yädän. Ne düşünerlär kuvetlär bizim için, biz da burada insanız, köpek diiliz. Bizim da var uşaklarımız, studentlerimiz, analarımız. Bizdä var ölä uzmannar, angıları karı — koca burada işleerlär. Onnar nesoy yaşasınnar? Gelin da görün, nicä biz yaşȇȇrız. Nesoy var nicä insana yarım yıl ödämemää. Ne biz iyelim, nesoy yatalım, nesoy kalkalım?»,- nışannadı «Demir yolu» Komrat stanţiyası uzmanı Natalya Susanu.
MD İnfrastruktura Ministerliin devlet sekretari Mirça Pȇskȇluţa demir yolu uzmannarınnan buluşmakta nışannadı, ani Hükümet problemayı çözmää çalışȇr.
«Bi̇z mi̇ni̇sterli̇k uurunda infrastruktura proektlerini i̇lerlederi̇z. Neredä lääzım, devlet yardımı var. Problemayı çözmää deyni her afta biz «Demir yolu» kuruluşun önderciliinnän buluşȇrız»,- nışannadı MD İnfrastruktura Ministerliin devlet sekretari.
«Demir yolu» Komrat stanţiyası uzmanı Dmitriy Mitioglo nışannadı, ani durum pek zor.
«Bizim kuruluşumuzda katastrofalı durum, mal yok, malları geçirmäk yok, insannara kazançlarını vermeerlär, yok ne isinnär. Herkezin var krediti, uşakları, studenti, şkolacıları. Onnarı her gün şkolaya geçirmää lääzım. Studentlerä nesä yannarına vermää. Pek çok problema var, ama onnar çözülmeerlär»,- Dmitriy Mitioglo nışannadı.
Nikolay Rotarenko «Demir yolu» Komrat stanţiyasında 50 yıldan zeedä işleer. Annadȇr, ani ay paraların yoksuzluu insanın umudunu heptän keser.
«Biz hepsi protestlerä ekleneriz, çünkü büünkü gündä insannar yok neylän uşaklarını doyursunnar. O aylelär sä, angılarından karı-koca burada işleerlär, onnar heptän zor durumda. Zor düşünmää dä, ani yok ne imää, ne giimää, ne uşakları doyurmaa. Katastrofa»,- Nikolay Rotarenko annadȇr.
MD demir yolu uzmannarı fevralin 14-dä protestleri geçirdilär. Onnar neetlenerlär protestä fevralin 28-dä da çıkmaa.
Avtor: A. Terzi, operator: V. Kıssa, montaj: M.Kazaku
Gagauziyanın hem Moldovanın en mekalı haberleri GRTnın Telegram kanalında!