Oktäbrinin 20-dä Prezident seçimneri geçtilär. İkinci tura M. Sandu hem A. Stoyanoglo geçtilär. Maya Sandu için kendi seslerini seçimnerä katılan insannarın 42,45 % verdilär. A.Stoyanoglu için — 25,98%. Konstituţiyaya diişmeklerini giriştirmää deyni kendi kayıllını seçimnerdä pay alan vatandaşların 50,16% gösterdi. 49,84% — söledilär, ani onnar istämeerlär, ki Moldovanın temel dokumenti diiştirilsin. Nicä seçim proţesi geçti, türlü kurumnarın temsilcileri gözlettilär. Bu sayıda Promo-Lex asoţiaţiyası da. Netürlü kanon bozmaklarını onnar sayıya koydular açıklȇȇr Natalya Andrieş.
Moldova prezidendin hem Respublika konstituţiya referendumun süresindä 614 ayırmak bölümündä peydalandı lääzmnık milli gözledicilerdä, haberledi Promo- lex diil devlet kurumun başı Nikolay Panfil.
«30 ayırmak bölümündä, neredä kendi hakını kullandılar Pridnestroviye yaşayannarı, temsil edildi birär gözledici. Lääzım nışannamaa, ani sınır aşırıda 91 gözledici vardı. Barabar statist gözledicilärlän misiyayı 89 mobil grupası yapardı, angıları ayırmak bölümnerindä monitoring geçirdilär»,- nışannadı Nikolay Panfilov.
Milli gözledicilerdä vardı seçim proţesin demokratik misiya hakı. Onnar öncä haberlerä görä belli ettilär 778 ayırmak proţesin yannışlıklarını bölümnerin açılmasında hem kapanmasında hem ses vermäk proţesindä, urguladı Nikolay Panfil.
«Bütündän 36 olay belli oldu, açan agitaţiya materiallar ayırmak bölümnerin yannarında bulunardılar bütün günün süresindä. Hep ölä belli oldu on olay, açan gözledicilär girämedilär seçim bölümnerinä. 31 olay, açan ses vermäk için urnalarda yoktu damgalar, yada onnar bozuktular. Belli oldu 51 olay, açan bölümnerin içäända hem dışaanda yabancı insannar bulunardılar»,- ekledi Panfilov.
Taa sık belli olardılar yannışlıklar, angıları baalıydılar ses vermäklän, 175 olay, açan bületenneri patredä çıkarardılar, 17 olay, açan ayırcılara para verärdilär, 11 olay, açan insanı maşınalarlan seçimnerä getirärdilär, 61 olay, açan ses verärdilär grupaylan. Belli oldular yannışlıklar ayırcıların listelerin kurulmasında da, nışanandı Promo- lex kurumun başı.
«Alarak esaba olayları seçim günündä, lääzım nışannamaa, ani bütündän gün raat geçti. Olmadılar kötü hem hatalı olaylar, bölümnerdä hem transportta. Bu ii çıkışlara getirdi, neçinki yaşayannar raatlıkta ses verdilär, diildilär korkudulmuş türlü durumnarlan»,- nışanandı Promo- lex kurumun başı.
Hep ölä Promo- lex gözledicileri belli ettilär 25 yannışlık protokol yazmasında Prezident seçimnerindä hem 45 Konstituţiya referendumunda. Promo- lex asoţiaţiyası diil devlet kurumu, angısının neeti ilerletmää demokratiyayı Moldovada hem Pridnestrovye regionunda, koruyarak insanın haklarını, kontrol ederäk demokratiya proţeslerini, hem kaavilederäk vatandaş cümnesini. Promo- lex kontrol eder hem gözleder seçim proţeslerini dä.