Gagauziya Başkanı Guţul Evgeniya hem HT başı Dmitriy Konstantinov Gagauziya primarlarınınnan buluşmayı geçirdilär, oturuşun süresindä bakılan soruşlar için annadȇr A.Terzi.
Buluşmanın süresindä Gagauziya Başkanı Evgeniya Guţul şükür etti primarları onnarın aktiv pay alması için Gagauziya Şarap festivalindä.
«En ilkin istäärdim şükür etmää sizi, ani pay aldınız bizim yortumuzda kasım ayın 9-da. İsteerim nışannamaa, ani yortuda bulunan delegaţiyalar pek beendilär bu yortuyu. Haliz RF eni Büükelçisi. O pek şaştı gagauz halkın musaafirciliinä. Herbir primȇriyayı bu iş için şükür ederim» ,- nışannadı Evgeniya Guţul.
Primarlarlan buluşmaya teklif edildi Gagauziyanın territorial asker merkezin komisarı Nikolae Pasat, angısı açıkladı angı uurda bulunȇr olayın açıklanması, angısı baalı Millet armata sıralarında geçinän soldatların işinnän.
«Güç, ama bizdä oldu iki olay, açan bizim soldatlarımız kendilerini askerdä öldürdülär. Biz ofiţial kiyatlan danıştık İç işleri ministerliinä, ama cuvap olmadı. Biz isteeriz bilmää, nicä bu olay aaraştırılȇr, angı uurda bulunȇr. Bu soruşa cuvap için biz sizi burayı büün teklif ettik»,- ekledi başkan.
«Büünkü gündä bu olay için bendä açıklamak yok, çünkü aaraştırmaklar bu iki iştä taa geçirilerlär. Peydalandıynan çıkışlar, biz sizä bilgi verecez»,-nışannadı Gagauziya Territorial asker merkezin komisarı Nikolae Pasat.
Oturuşun süresindä açıklandı soruş, angısı baalı 2024-cü yılın bücet gerçeklenmesininnän hem 2025-ci yılın bücet proektin işletmesininnän. Gagauziya Finans bakanı işini götürän Tatyana Doyçeva nışanadı, ani primȇriyalar 2025-ci yılın bücet proektini işledärken, hepsi incelikleri esaba alsınnar lääzım.
«Ministerliin tarafından gelän teklifleri biz sizä verdik, ilk haberlerä görä bu yıl diişmeklär olmayaceklar, ama hepsi özellikleri bücet proektlerini işledärken siz lääzım alasınız esaba. Ofiţial diişmeklär olmarsaydılar, biz eski shemaya görä işleyecez. Bücetleri lääzım kısa zamanda işledäsiniz hem nasaatları bakılmaya veräsiniz»,- Gagauziya Finans bakanı işini götürän Tatyana Doyçeva nışannadı.
İş süresdindä bakıldılar başka önemni soruşlar da, angıları baalı Gagauziya yaşamak erlerindä var olan problemalarlan.
