Komrat kasabasında var bir sıra istoriya anmak taşları. Herbirin var kendi özellikleri. Onnarın sayısında Kurtarıcılara anmak taşı, angısında herzaman anmak ateşi yanȇr. Bü günnerdä Komrat kasabasının yaşayanı İvan Velçev soţial baalantılarında açıkladı videoyu, angısında belli, ani anmak yangını çalıştılar kapamaa kurumuş yapraklarlan, ki o hiç görünmesin. Kim bunu yaptı belli diil. Poliţiya aaraştırȇr olayları.
«Gezinerim uşaklan bu parkta. O bana sorȇr, neredä anmak ateşi, angısı herzaman burada yanȇr. Te ne oldu bu ateşlän. Kimisi aldı da sıbıttı burayı kuru yaprakları, da te ne oldu.Gaz yanȇr, ama ateş görünmeer. Yapraklar kapadılar ateşi. Ne isteerim sölemää hepsi insannara. Komrat kasabasının yaşayannarı hem musaafirleri, çalışın korumaa terdibi kasabada. Koruyun hepsi anmak taşları, angıları var Komratta. Herbir toplarsa hem korarsa burasını, hepsi olacek islä»,- İvan Velçev, Komrat kasabasının yaşayanı haberledi.
Gagauziya poliţiya cümnä koruması bölümü başı Pötr Kristioglo haberledi, ani poliţiyada şindi yok kolaylık haberlemää, kim kabaatlı bu olayda.
«Bu vakıda biz belli ettik olayı, ani istedilär Kurtarıcılara anmak taşında sündürmää ateşi. Çalışȇrız toplamaa hepsi faktları, ki belli etmää, nicä bu oldu. İleri dooru belli edecez cuvapçıları»,- Pötr Kristioglo haberledi.
Sade ondan sora, nicä poliţiya aaraştıracek bu olayı, poliţiya var nicä olacek haberlesin, angı ceza koyulacek ona, kim bu olayı yaptı.
