Komrat kasabasında Pokrov yortusunda kruçalı gezi geçti. Onda pay aldılar popazlar, kuvet temsilcileri hem yaşayannar.
Ayoz Panayıya Pokrov yortusu Komratta liturgiyadan başladı. Ondan sora popazlar, kuvet temsilcileri hem yaşayannar kasabayı kruçalı geziylän dolaydılar.
«Vladıka Anatoliyin ii sözlemesininnän biz büün kruçalı geziyi geçireriz. Bölä büük yortuda pek islää geçirmää bu olayı. Gezi Allahın yardımınnan geçer. Çin sabaaylendän insan kliseyä toplanȇr, duva eder, komkasını alȇr»,- dedi Födor Karabadjak protoierey
Kruçalı gezi Komratta 11-ci yıl sıravardı geçiriler. Pandemiya yılında sade bir yıl ara verildiydi, nışannadı cümnä aktivisti Mihail Vlah.
«15 km. yakın biz kasabayı dolaylȇȇrız, herbir köşesini saarȇrız. Başlȇȇrız merkezdän İver monastırına kalkȇrız, sora Prorok İlya klisesinä, sora yalpug maalesi, sora da çan evinä gideriz. Geziya katılan herbir insan usluluk için düşüner, ki raatlık olsun»,- nışannadı Vlah.
Kruçalı gezinin pay alanarı Komradın sokaklarından geçärken kasaba yaşayannarı için duvalarını söleerlär. Olay her yıl kalabalıkta geçer.
«Bu gözäl yortuda yaşayannara saalık, kısmet, uygunnuk dileerim. Raatlık hem usluluk olsun , Alla uslandırsın devletleri».
«İnsannara usluluk dileerim, iilik taa çok, saysınnan biri birini, ko hepsi islää er üzündä olsun».
«Dileerim usluluk, raatlık, yaşayannar saysınnan biri-birini».
«En önemni raatlık olsun, insannar taa raatlansınnar, insan dalgalanȇr dünnedä olan işlär için».
Ayoz Panayıya Pokrov yortusu nışannȇȇr koruntuyu, angısını Panayıya insana başlȇȇr hem kendi örtüsününnän belalardan koruyȇr.
Avtorlar: A.Terzi, İ.Karaman, operatorlar: A.Glekov, S.Georgiev, montaj: A.Gerçu.