Büün, aprelin 14-dä Gagauz Erin hepsi okullarında patriotizma lineykları geçtilär. Bu olayların baş neeti — evlad boylarını akına vatandaş olmaa üüretmää. Busoy iniţiativaylan Üüretim bakannıı geçennerdä çıktı. Aprelin 8-dä Bakannık komiteti maasuz kararı kabletti. Da te artık bu karar giriştirilmää başladı. Patriotizma lineykları her afta pazertesi günnerindä geçirileceklär. GRT-nın çekim grupası D.Mavrodi adına liţeyindä bulundu. Nicä burada ilk patriotizma lineykası geçti sıradakı süjetimizdä açıklayacȇz.
Patriotizma lineykaları Moldovanın hem Gagauz Erinin gimnalarından başladılar. Hep ölä üürenicilär vatan için şiirleri okudular.
Patriotizma lineykaların baş neeti — ana tarafına sevgiyi terbi etmää, evlad boylarını akına vatandaş olmaa üüretmää, söledi D.Mavrodi adına liţeyin başı Maksim Bolgar.
«Biz hepsimiz kuvet koyalım lääzım, ki Vatanımız olsun taa paalı, taa islää»,- nışannadı direktor.
Sıradakı lineyka aprelin 29-da geçirilecek. O «Ana dili» yortusuna adalı olacȇk.
«Gurur duyȇrım, ani Vatanım var — Moldova hem Gagauz Eri»,- nışannadı üürenici.
Patriotizma lineykalarında üüredicilär üürenicilerä temel paalılıklar için annadacȇklar — Vatan sevgisi, akına vatandaş olmak, halkının istoriyasına saygı, dedelerdän kalma kultura varlıımızı korumak.
Moldovanın hem Gagauziyanın en mekalı haberleri GRTnın Telegram kanalında!