GHT geçtilär cümnä seslemekleri Gagauziya «İndividual alış-veriş patentleri için» kanon diişmeklerininnän baalı.
Diişmeklär «İndividual alış-veriş patentleri için» kanonuna işledildilär, alarak esaba alış-verişçilerin danışmaklarını, angıları bu kanona görä Gagauziyada kendi işini gerçekleerlär. Onnar danışȇrlar, ki kanona diişilmeklär versinnär kolaylık Devlet soţial sigortalaması vergisini başlamaa ödemää diil 2025-ci yılın yanvarin birindän, ama 2026-ci yıldan, nışannadı GHT bücet komissiyası başı Nikolay İvançuk: «Bu cümnä seslemeklerini biz geçireriz 3 dolayda çalışan alış-verişçilerin danışmaklarına görä. Onnar isteerlär, ani biz taa bir yıla verelim onnara kolaylık vergisiz kendi işini gerçeklemää. Bu baalı onunnan, ani energetika uurunda zor durum».
Gagauziya Ekonomika ilerlemesi hem turizm bakanı Larisa Çernev nışannadı, ani patentä görä işleyennär da lääzım pay alsınnar devletin bücet kurulmasında.
«Gagauziyada büün sayıda var 1957 alış-verişçi, angıları patentlerä görä işleerlär. 500-zü onnardan pensiyada. Biz lääzım annayalım bir iş , angısı pek önemni ekonomika ilerlemesi için, bücet büün kabletmeer 25 mln.ley-bu vergilär cümnä sigortalaması uurundan, angılarını patentçilär ödemeerlär. Biz bunu lääzım bilelim hem annayalım, ani bu bizim bücetimiz. Pek isteeriz, ani bu alış-verişçilär annasınnar bunu»,- Larisa Çernev nışannadı.
«Bän bütün cümneyi teklif ederim annayışlı baksınnar patentçilerä, HT deputatlarına hem Bakannık komitetinä. Biz lääzım verelim kolaylık bu insannara büün işlemää . Nışannandı, ani onnarın sayısı 1900 insandan zeedä, büün biz bu insannara başka uurda iş verämeyecez, eer onnar işsiz kalarsalar»,- GHT deputatı İvan Dimitroglo çizgiledi.
GHT deputatı Vladimir Kıssa nışannadı, ani problemanın çözülmesi için başka kolaylıkları da aramaa lääzım.
«Biz lääzım annayalım durumu içindän, çıkmaa deyni ondan.Yada biz kendi üstümüzä alalım harcamakların bir payını kassa aparatlarını satın almaa deyni. Biz günü hem yılı var nicä diiştirelim, ama durum açıklanmȇȇr. Biz lääzım bulalım ölä kolaylıkları, ani karşı gelmeyelim sora daava problemalarınnan»,- teklif etti Kıssa.
Cümnä seslemeklerindä bulundular Gagauziyada patentlerä görä işleyennär dä, onnar nışannadılar, ani kassa aparatların satın alması hem işletmesi pek büük ük olacȇk.
«Biz kendimiz ödeeriz şafkı, sıcaa, kirayı, taa kassa aparatlarını da mı lääzım alalım? Bu pek büük bir ük olacek. Bizdä pek çok problema var. Kimsi bilmeer, nesoy biz kendimiz getireriz bu malı hem satȇrız onu».
Gagauziya Ekonomika ilerlemesi hem turizm bakanı yardımcısı Tatyana Spatarenko nışannadı, ani devlet bücetinä vergilerin ödenmemesi olȇr sebep ona, ani bu kanonu daavalarda sora zapederlär.
«Bän taa bir sıra isteerim çizgilemää, ani herbiri annasın, ani o finanslar, angılarını kableder devlet büceti, bu diil erli bücet. Bunda da baş problema toplu, iuristlär var nicä sölesinnär, ani bu iş olȇr sebep ona, ani biz bu kanonu sora daavalarda kaybederiz»,- annattı Gagauziya Ekonomika ilerlemesi hem turizm bakanı yardımcısı Tatyana Spatarenko.
Tekliflär, angıları açıklandılar cümnä seslemeklerindä, bakılaceklar kuvet temsilcilerininnän.
Avtor: A. Terzi, operator: V.Kıssa, montaj: İ. Rezuneţ