Kontribuţiyalar, kapital investiţiyalar, infrastruktura proektlerini finansamak. Bu hem başka soruşları baktılar GHT deputatları kendi sıradakı oturuşunda.
GHT deputatları 50-dän zeedä soţial proekti için seslerini vedilär. Hep ölä onnar kontribuţiyaları geri çevirmäk programasına enilikleri giriştirdilär. Bunu deputatlar yaptılar alarak esaba publika kurumnarın hem erli kuvetlerin danışmaklarını. Kontribuţiyalar soţial proektlerin giriştirilmesinä deyni verileceklär. Bu sayıda infrastruktura proektleri hem kultura uurunda proektlär. Pogramada kontribuţiyaları geeri çevirmäk için 20 million ley bakılı. Ama ekonomika politikası komissiyasının başı N.İvançuk haberledi, ani taa hepsi küülär, kasabalar kontribuţutiyaları kabletmää deyni lääzımnı olan dokumentleri taa vermedilär.
«Satul European» programasına görä 15 primariya kontribuţiya kabletsin lääzım. Ama kabledecek sadece 5 primariya, çünkü kalanı dokumentleri taa vermedilär. Açan lääzımnı dokumentleri vereceklär ozaman da kontribuţiayaları kabledeceklär»,- İvançuk haberledi .
GHT oturuşu çok vakıt sürtmedi. Deputatalar 30 minudun içindä 4 soruş baktılar. Bu sayıda yol infrastrukturasınnan baalı soruş en çok vakıt aldı. Çoyu deputatlar söledilär, ani onnarın küülerindä-kasabalarında büük yaamurdan sora yollar bozuldular, hem çizgiledilär, ani bu problema mutlak çözülsün lääzım.
«Bizim yollarımız kötü halda. Hızlı medik yardımı maşinası da geçämeer. Bu soruşu erli nasaatın oturuşunda da artık kaldırdılar. İsteerim sormaa, siz, Bakannık komiteti, küülerdän, kasabalardan sordunuz mu — geçän büük yaamurlarda sora yolların durumnarı nasıl? Hem var mı nicä Bakannık komiteti yaşamak erlerimizdä yardımcı olsun. Bileriz, ani Bakannık komitetin Rezerva fondunda bu neetlerä bir million ley bakılı. Bu paralarlan büük yaamurların hem lüzgerlerin beterinä zararı görän küülerä, kasabalara yardım etmää var nasıl. Var mı nasıl yardım edäsiniz onnara, kimä bu yardım büün lääzım?»,- nışannadı Mihail Jelezoglo.
«Bu büük yamurlardan sora en büük zararı Beşgöz gördü. Yollar bozuldu. Yaamur suları hepsi çakılları aşaa aydadılar»,- ekledi deputat Karaja.
Deputatların soruşlarına cuvap etti Gagauz Eri İnfrastruktura bakannıı başı işini yapan Sergey Bolgar.
«Respublika balansında olan yolları «Drumur Komrat» çorbacılıı yaptı. Biz Bakannık komitetin balansında olan yolları esaba getirdik. Biz primarlarlan buluştuk. Kimilerinä yardım ettik. Kalanı bizim Hatalı olaylar komissiyamıza yardım için danıştılar. Ama onnar kuralları bozdular. En ilkin erli Hatalı olaylar komissiyası oturuşunu geçirsin lääzım. Sora dolay uurunda komisiya kararı kableder, da sadece bundan sora region uuruna bu soruş çıksın lääzım»,- nışannadı Bolgar. .
GHT deputataları avtonomiyanın 2024-cü yılın Yol infrastrukturası programasına diişmekleri giriştirdilär.
Avtor: V.Çoban E.Manita, operator: V.Kıssa, montaj: A.Gerçu