Çadır dolayın Kazayak küüyündä başa çıkarıldı önemli soţial proekti. Orada açtılar büvet, ki yaşayannarda olsun kolaylık pak su içmää.
Pak su-o temel kaavi saalık için. Kazayak küüyün primarı Grigoriy Kior annattı, ani yapıldı analiz, angısı gösterdi, ani Kazayak küüyündä suyun kalitesi diil islä. Bu var nicä zarar insannarın saalıklarına getirsin. Kabledildi kararlar çözmää bu problemayı.
«Biz Kazayakta bulunarak, hepsi insannar biler, ani kaliteli, ii durumda su, o pek ii insanın yaşaması için. Onuştan bu proekt 2022 yılından, ama onun çeketmesi oldu 23-cu yılında. Hep biz aaradık nasıl onu başarmaa, bizim insan gidärdi başka küülerä almaa suyu, Taraklıdan, Kortendan, Çadırdan, da biz bu işi istedik ilerletmää»,- nışannadı Kazayak küüyün primarı Grigoriy Kior.
Proekt giriştirilsin deyni, geçti yıl erli investiţiyalarından verildi 500 bin ley, bu yıl regional bücetından verildi taa 319 bin ley, taa 300 bin leydän zeedä koyuldu Kazayak küüyün bücetından, annattı GHT deputatı Kazayak küüyündän Aleksandr Dülger.
«Bu yıl dekabr ayında Kazayak küüyün yaşayannarında olacek kolaylık gitmedään aşırıya, burada almaa pak su. Bu sade bir proekt, bizdä var plannarda taa bir büvet açmaa»,- çizgiledi GHT deputatı Kazayak küüyündän Aleksandr Dülger
Önemli Gagauziyanın yaşayannarına kurmaa kolaylıkları, ki insannar pak suyu kabletsin, nışannadı Gagauziya Başkanı Evgeniya Guţul.
«Bu küüdä çok problema suylan, ondan 900 bin biz verdik bücettän, İspolkom verdi, ki yapmaa büvet, neredä insannar alaceklar suyu. Neçinki sindi insannar bu küüdän giderlar başka küülerä su için, ki su içmää»,- söledi başkan Evgeniya Guţul.
Bütün proektin paası Kazayak küüyündä büvedi düzülmesi için tutȇr 1 million 428 bin ley, bu sayıya girer 450 bin ley erli bücetından, ki büvedın dolayını tertiplemäk işlerini yapmaa.
