Kazayak küüyün primariyası LIADER programasının sınırlarında barabar «Kilim Dolayı» cümnä kurumunnan taradı «Pak küü — pak devlet» grant proektini. Bölä oldu kolaylık almaa 730 gübür konteynerlarını.
Kazayak küüyü çalışêr giriştirmää ekologiya programalarını. Şindi yapılan proekta görä insannara parasız daadêrlar gübür konteynerlarını. Şindi toplamaa gübürleri taa kolay olacek. Bu pek önemli bir adım, ki korumaa küüyü tertipli hem pak durumda. Primariya uzmannarı barabar temizlemäk bölümün azalarınnan verdilär insannara konteynerları hem annaşmayı parasız kullanmak için imzaladılar. Kazayaan yaşayannarı buna sevindilär hem urguladılar, ani şindi taa kolay olacek toplamaa gübürleri.
« Islää, islää lääzım versinnär, saa olsun primariya.İşlesinnär ötää dooru».
« İşleeуrlär dä, vererlär da, olmayacek hererdä gübür. Saa olsunnar, primar da».
«Saa olsun bizim primar, bizim büük başkannar, ani yapȇrlar bu işleri bizä, yolları yaptılar, konteynerları vererlär, hepsinä çalışêrlar, biraz da para versinnär, taa islaa olacek».
«Saa olsun primariya, ani yardım ederlär».
«Hepsi islää, kullanacez onu, çok saa olsunnar».
«İslää, o lääzımnı iş, kullanacez».
Proekt «Pak küü — pak devlet» ilerleder «Pak küüdän — pak Dünneyä» proektini, angısı giriştirildi 2022-ci 2023-cu yıllarda, haberbedi Kazayak küüyün primarı Grigoriy Kior. Ozaman alındıydı 320 konteyner .Onnarı da yaşayannara daattılar.
«730 konteyner biz aldık şindi, daadȇrız onnarı insannara, taa ileri kabledildiydi 320, ama bu bizä etişmeyecek. Primariya taa ilerledecek bu işi ötää dooru. Taa 430 konteyner , ölä saydıynan, bizä lääzım olacek bütün küüyü kaplamaa. Bu olêr primariyanın bucetindän, yazêriz proektleri, ki kabletmää. Var fondlar, angılarından bu paralar. İnsandan bişey koyulmêȇr. Biz onnarı daadêrız annaşmaklara görä, ani onnar kullansınnar, ani taa kolay olsun çıkarmaa bu gübürleri, taa pak olsun bizim küüyümüz»,- nışannadı primar Grigoriy Kior.
Grigoriy Kior hep ölä haberledi başka proektlär için, ani şindi çalışmak uurunda bulunêrlar Kazayak küüyündä.
«Şindi bu vakıt küüdä biz savaşêrız başartmaa iki proekt, angılarını çekettirildilär erli nasaatlan. Biz çıktık AIPA fonduna.İki kurum var küüdä : AO «Kilim Dolayı» hem da AO «Evlad». Bir proekt – «Pak küü — pak devlet»,- ekledi primar.
Kazayak küüyün primariyası ortaklarlan ilerleder barabar çalışmakları hem giriştirer lääzımnı programaları. Hepsi ekologiya proektleri aslıya çıkarılêrlar o neetlän,ki küüdä taa ii hem taa saalıklı yaşamak olsun.
Avtor: A. Karapirä, operator hem montaj: L. Arfanos