Komrat muniţipiyasının primariyasında geçti regional illerlemesindä agentstvosunun oturuşu,angısında pay aldı devlet kuvetlerin temsilcileri da.Bu vakıtta da primariyanın önündä cümnedän insan protest akţiyasını geçirdi.
MR İnfrastruktura ministerlii hem Regional illerlemesi agentstvosu geçirdilär ilk bu yılda sıradakı oturuşu,angısında pay aldı viţe-premier ministrusu Vladimir Bolä.O haberledi,angı proektlär için laf gitti oturuşta.
«Oldu oturuş,angısında belli eildilär çıkışlar regionda giriştirilän proektlerä görä.Biz lafederiz Çadır için, neredä çok illerlemäk olȇr.Var nicä göräsiniz, nicä orada düzülerlär türlü erlär, beygir ferması. Biz lafederiz Komrat için,neredä su sistemnarı hem kanaliţaziya çekiler. Kimi proektlär başarılmadılar,ama kabledildi karar uzaltmaa onnarı, bitirmää deyni onnarı bu yıl»,- Vladimir Bolä söledi.
At-prolin turizma kompleksini beygir fermasında Çadırda plana koyulu başarmaa 2025 yılın may ayında, nışannadı Regional İllerlemesi Agentstvosu başı Tatyana Donçeva: «Finanslamak annaşmasına görä hepsi işlär yapıldılar, da lääzımdı ödensinnär erli kuvetlärlän , ama kabledildi karar, ki zorlatmamaa bu harçlarlan erli büdjetı, bu üzerä kimi diişilmeklär proekttä yapıldı, obiekti may ayın bitkisinä kadar ekspluataţiyaya vermää deyni».
Oturuşa neredä pay aldı Vladimir Bölä erli mass-media kurumnarı düşämedilär.Çoyunu jurnalistleri kolvermedilär salaya.Ministru komentariyasını verdi, söleyip, ani o zanaatlanmadı bu soruşlan.
«Bu soruşa katılmadım.Teklifä görä geldim»,- Vladimir Bolä söledi.
Oturuşun vakıdında primariyanın önündä Gagauziyanın yaşayannarın protest akţiyası gidärdi. İnsannar açıkladılar nesoy soruşlar onnarı en pek raatsız eder.
«Neçin başkan çaarılmadı,angısı kanona görä ayırıldı bizim halklan bu oturuşa?Bu diil dooru».
«Çok öderiz gaz için,şafklar için.Etişmeer.Hepsi paalı. Yapamȇrız,zor».
Protesti geçirän insannarın önündä söz tuttular aktivistlär hem avtonomiyanın öndercileri.
«Biz lafederiz onun için,ani oturuşta pay almȇȇr başkan, kanona görä ayırılı. Halk verer ona hak temsil etmää bizi hepsi kuvet organnarda.Bän söledim hem teklif ettim Boläyı gelsin Bakannık komitetä buluşmaa başkannan»,- nışannadı İlya Uzun.
Başkanın hem Bakannık komitetin işlerindä bakanı İvan Kolioglo nışannadı,ani vatandaşların soruşları dooru, neçin ki Bakannık komitetin öndercisi girmeer Regional İllerlemesi nasaatına.
«Bu protest başkanın tutturmasına, hem erli kuvetlerin tutturmasına. Herzaman başkan girärdi regional illerlemäk nasaatına»,- söledi Kolioglo.
Regional İllerlemesinin saytında yazdırılı maasuz dokmenttä angı kişilär regional nassata Gagauziyanın illerlemesindä girerlär.
Orada söleneеr:
- Regional nasaatı kurulȇr erli cümnä kuvetlerin temsilcilerinnän,özel sektordan hem cümnedän
Onun toplumuna girerlär:
- Gagauz Eri başkanı
- Dolay administraţiyaların öndercileri
- üç primar herbir dolaydan, angıları ayırılı primarların nasaatınnan;
- birär temsilci özel sektorundan hem cümnedän
Moldovanın hem Gagauziyanın en mekalı haberleri GRTnın Telegram kanalında!