Gagauziyada ilerleerlär işlär, ki üüretmäk kurumnarında koşulları taa ii yapmaa. Çadır muniţipiyasında iki önemni proekt başarıldı: enilendilär örtülär Pötr Kazmalı adına gimnaziyasında hem Uşaklar için yaradıcılık merkezindä. Başkan Evgeniya Guţul iş süresindä baktı, nicä işlär yapıldılar.
Avtonomiya bücetındän verildi 4 million 800 bin ley Çadır kasabasında Pötr Kazmalı adına gimnaziyasında örtünün düzülmesinä. Üüretimäk kurumun direktorunnan hem üüredicilärlän buluşmada başkan Evgeniya Guţul nışannadı, ani ii koşulların kurulması uşakların üürenmäk hem ilerlemäk uurlarında Avtonomiya kuvetlerin çalışmasında ilk erdä durêr. Önemni nışannamaa ,ani başkan baaşladı gimnaziyaya bu buluşmada 18 zamandaş planşetları.Pötr Kazmalı adına gimnaziya direktoru Diana Räbaya nışannadı, ani okulda örtünün diişilmesi — en büük hem lääzımnı proekt.
«Sade varkana ii örtü, ozaman var nicä lafetmää avadannıklar için hem okulun düzülmesi için. Bu proekti biz çok bekledik. 8 yıldan zeedä çalıştık bu uurda, ki onu aslıya çıkarmaa. Büük şükür Bakannık komitetinä hepsi üüretim kurumnarından, angıları bu programaya girdilär. En önemni, en lääzımnı. Saa ol lafları söleerim hepsinin adından — üüredicilerdän, uşaklardan hem analardan—bobalardan»,- Diana Räbaya nışannadı.
Gagauziya üüretmäk bakannın başı Nataliya Kristeva urguladı, ani bu okulda yapıldı en büük bir proekt.
«Bu okulda örtünün paası kurdu yakın 5 million ley. Ama burada halizdän pek prost durumdu. Bütün üçüncü kata hem ikinciya da artık su akardı yaamurlarda. Uşaklar yoktu nicä burada üürensinnär. Bizä pek önemliydi düzmää bu örtüyü. Proekt uygun oldu, lääzımnı vakıda girdilär, işlär islää yapılı.Bu gimnaziya bitki 4 yılın içindä, nicä okul reytingı kuruldu, hep ilk eri kazanêr hepsi punktlara görä»,- Kristeva urguladı.
Çadırda iş vizitin sınırlarında başkan Evgeniya Guţul baktı Uşaklar için yaradıcılık merkezini dä. Burada da örtü düzüldü. Bu proekti yapmaa deyni verildi 1 million 100 bin ley. Kurumun başı Elena Danacı haberledi, ani burada türlü yaratmak bölümnerindä zanaatlanêr yakın 450 uşak.
«Nicä dä herbir evdä, örtü pek önemni olsun deyni herersi kuru. Ileri dooru plannanêr geçirmää düzdürtmäk işlerini dä. Umutlanêrız, ani hepsi olacek islää, yakın vakıtta uşaklarlan gelecez bu binaya. Bu yapı pek kaavi hem sıcak»,- Elena Danacı haberledi.
Örtülerin düzülmesindä işlär yapılı üüsek kaliteli uurda hem lääzımnı vakıtta, nışannadı Gagauziya başkanı Evgeniya Guţul.
