Gagauziaya Başkanı Evgeniya Guţul hem Gagauziya üüretmäk Bakannıın başı Natalya Kristeva, iş vizitinnän dolaştılar Valkaneş dolayın üüretmäk kurumnarını.
Etulia küüyün S. Ekonomov adına liţeyindä giriştiriler iki infrastruktura proektleri: yısıtmak sisteması diiştiriler hem güneş panelleri koyulȇr. Yısıtmak sistemasının düzülmesinä avtonomiyanın kuvetleri verdi beş üz bin ley. Litvadan artakların yardımınnan, liţeyin örtüsündä koyuldu 50 kilovat güneş panelleri.
Bu iş yardım edecek kapatmaa liţeyin elektroenergiya harçlarını hem azaltmaa harcamakları. S.Ekonomov liţeyindä 233 uşak üürener.
Evgeniya Guţul,Gagauziya Başkanı nışannȇȇr : «İsteeriz, ki herbir liţeydä, gimnaziyada, herbir okulda bizim Gagauziyanın olsun kolaylıkları, hepsicii ne lääzım bizim uşaklarımıza, angıları islä üüreneceklär, hem da üüredicilär için, angıları uşakları üürederlär. Onnar için yapacez hepsiciini».
Valkaneş kasabasının S.Rudenko adına gimnaziyasında yısıtmak sistemasını diiştirerlär. Bu işä Gagauziyanın bücetından verildi 900 bin leydän zeedä. Başkan annattı, ani bu proekt pek önemli, çünkü geçti yıl gimnaziya bulundu zor durumda. Yısıtmak sisteması bozuldu, onuştan lääzım olduydu üütretmük proţesini onlayn formatına geçirmää.
«Önemli bu proektlär, sıcak sisteması lääzım işlesin. Biz lääzım her zaman hazır olalım. Suuk vakıtlar gelerlär, bizim uşaklara lääzım olsun sıcak, olsun sıcak er, neredä onnar üüreneceklär. İsteerim sölemää, ani biz hepsiciinii yapacez, ne kuvedimizdä var, ki bu gimnaziya yaşasın, ilerlesin, gözelleşsin hem olsun herbir kolaylıklar hem üüredicilerä hem üürenicilerä»,- ekledi başkan.
Gimnaziyada düzülecek yısıtmak sisteması hem koyulacek eni katöllar. Valkaneş kasabasının S.Rudenko adına gimnaziya başı Fatima Aldä nışannadı, ani bölä kolaylıklar yardım edecek taa üüsek uura kaldırmaa üüretmäk proţesini.
Fatima Aldä S.Rudenko adına Valkaneş kasabasının gimnaziya başı çizgiledi: «Lääzımlıımız bu proektä pek büük, okulda lääzım olsun sıcak, ki bizim uşaklarımız üürensin ii koşullarda. Biz hepsimiz bu şkolada barabar yapȇrız ii koşulları uşakların üüretmük proţesi için, ki onnar kabletsinnär kaavi bilgileri».
Büünkü gündä Valkaneş kasabasının S.Rudenko adına gimnaziyasında üürener 359 üürenici. Üüretmäk proţesini götürer 31 üüredici.
Avtor: O. Duloglo, operator hem monraj: L. Arfanos