10-cu yıldönümünü tamannadı avtonomiyanın futbol klubların birisi «Oguzsport». Yortu, angısı bu dataya adalıydı, Komrat Kultura evindä geçti. Onda futbolcuları hem trenerleri kutladılar.İi başarları onnara sponsorlar, analar-bobalar hem GHT başı Dmitriy Konstantinov adadı.
Futbol komandaları, angıları «Oguzsport» klubunda sınışları geçirerlär, ii çıkışları devlet çempionatlarında göstererlär. Bu yılların süresindä çocuklar üüsek uurda devlet hem halklarası yarışmaklarında pay alȇrlar. Yortulu olayda trenerleri hem sportçuları diplomnarlan baaşışladılar. Nicä trenerlär urguladılar, 10 yıl geeri «Oguzsport» klubun istoriyası başladı.
«En ilktän yapıldı ilk adımnar , on yılın içindä gün-gündän hem yıl-yıldan klub ilerledi. Bizdä var çocuklar , angıları taa klubun çeketmesindän üüsek uurda futbola oynȇȇrlar. Da bizdä var çıkışlar»,- nışannadı baş trener İvan Tabanov.
«Bän isteerim kutlamaa klubu 10-cu yıldönümünnän , biz terbiettik uşakları, çıkışlar ii, ama gelecek 10 yıla taa kaliteli, professional uurunda terbi edecez uşakları. Hepsi anaları- bobaları şükür ederim, ani bizi inanȇrsınız hem birerdä bizimnän uşakları terbi edersiniz»,- söledi Valeriy Mavrodi , trener.
Nicä nışannadı «Oguzsport» klubun başı Anatoliy Mavrodi , bu yılların içindä çok zorluk vardı, ama sportçular onnarı geçtilär. Büün kluba 8 komanda gezer.
«Bän büün hodullanȇrım, ani bizim klubumuzda var büüklär komandası»,- «Oguzsport» klubun prezidenti Anatoliy Mavrodi nışannadı.
Kutlamaa klubu yıl dönümünnän şannı musaafirlär geldilär , angıları bu yılların süresindä klubun ilerlemesinä yardım ettilär. GHT başı Dmitriy Konstantinov nışannadı, ani Gagauziyada gençlär sportlan zanaatlanȇrlar, hem kuvetlär onnara şannı basamaklara kalkmaa yardım ederlär.
«Büün Anatoliyi şükür etmää isteerim, ani topladı kendi dolayında trenerleri, tehnikacıları, büün bunu diil kolay yapmaa»,- nışannadı spiker Dmitriy Konstantinov.
«Oguzsport» komandasının futbolcuları nışannadılar , ani insannar, angıları baaladılar kendi yaşamalarını futbollan, bütün yaşamalarını bu zanaata çekilerlär.
«Bän futbolu severim, neçinki bu pek meraklı hem pozitiv. Futbolda koordinaţıyayı hem ayaklarlan oyunu severim».
«Bän futbolu severim , zerä o göläl hem ii oyun . Bu yıl ii gideriz , bizdä çok taramak var, bu yıl ilk eri Moldova çempionatında kazandık».
«Te taman on yıl ilk sınıştan geçti , nicä biz futbollan zanaatlanmaa başladık. Futbol herkeret benim en sevän sportumdu, 6 yaşından başladım. «Oguzsport» — ilk klub, angısı Komratta açıldı. Ölä oldu, ani bän orayı düştüm da büünkü günädan burada çalışȇrım».
Bu yılların içindä klub hem uşaklar için onnarın anaları-bobaları hergün düşünerlär. Onnar herbir oyuna giderlär, herbir urulmuş gol için şüpelenerlär .
«Tutturȇrız onu, nicä futbollan zanaatlanmaa başladı, diişildi onun karakteri, disţiplina taa ii oldu».
«Olum futbollan zanaatlanȇr , zerä bän onu bu kluba getirdim, büün onnar bu rejıma sınaştılar, peydalandı eni dostlar. Sportlan lääzım zanaatlanmaa, çünkü bu saalıklı yaşamak».
Yortulu olayın süresindä hepsi sponsorlara, musaafirlerä hem masmediya partnörlarına şannı diplomnarını verdilär .
