Komrat kasabasının Nevskiy sokaanda yamurlu havada yok nasıl gezmää. Erli yaşayannar nışannȇȇrlar, ani yol, angısı götürer üürenmäk hem kultur obyektlerinä, bölä nicä M.Ȇminesku adına liţeyä hem Gagauz erin liderin Stepan Topalın ev — muzeyina lääzım maasuz düzülsün. İnsannar çizgileerlär, ani bölä yolda pek zor gezmää, may alez yaamurlu havada.
Komrat kasabasının Nevskiy sokaan yaşayannarı üzülerlär, ani yol, angısı götürer Ȇminesku adına liţeyinä hem Gagauz erin liderin Stepan Topalın ev — muzeyina, düzülmeer çok yıllar. Onnarın laflarına görä, olȇr ölä, ani yok nasıl gezmää, may alez yamurlu hem kaarlı havada.
«Olȇr ölä çamur, hepsi bu su akȇr pınara hem bana aulun içinä — bu islä mi? Getirdim biraya toprak, akmasın deyni su pınara. Makarki kapama deyni bu su erlerini. Burada uşaklar şkolaya gezerlär, büüklär hem büük yaşta insannar. Nicä siz düşünesiniz, bu erlerdän islä mi gezmää?»
«O sayılȇr var nasıl sölemää, nicä merkez yolu, burada yakın uşak başçası, liţey. Bizim sokaamızda bulunȇr muzey, nereyi gelerlär çoyu üürenicilär. Bulunȇrlar musafirlär hem önemli temsilcilär. Bän da sayȇrım, ani bu sokaa lääzım esaba almaa, neçinki biz yaşȇrız sol tarafta, da hepsi bu çamur, açan yaamur yayȇr, hepsi bizim ayulun içindä».
Komrat kasabasının primarı Sergey Anastasov haberledi, ani bu yıl plana koyulu kasabanın çoyu yollarına düzmäk işlerini yapmaa .İlk esaba alınaceklar yollar, angıları götürerlär kasabanın önemli obyektlerinä.
«Yannaşık bulunȇr Stepan Topal adına muzey, sokak getirer Mihay Ȇminesku adına № 2 okuluna. Uşaklar orayı gezerlär, bu pek önemni yolun parçası şkolayadan. Plana biz koyduk bu parça yolu, hepsi çekilecek ondan, nasıl komisiya karara gelecek, nereyi biz koyȇrız 6 nasaatçı hem 3 temsilci primariyadan. Sıraya görä bakılaceklar yollar, neçinki bu yıl sayıda yakın 30 yol. Nesoy yapılaceklar işlär, kararlayacek komisiya»,- Anastasov haberledi.
Nevskiy sokaan bir parçası, angısına lääzım maasuz düzmäk işleri, kurȇr yakın 600 metra.
Avtorlar: P. Barbova, O. Lotka, operator: V. Kıssa, montaj: A. Topal