Avtonomiyanın yaşayananrı umutlanȇrlar, ani gelän 4 yılın süresindä Moldovada usluluk olacȇk hem ȇkonomika ilerleyecek. İnsannar isteerlär, ki pensiyalar hem ay paraları üüselsinnär, yaşamak koşulları taa ii olsunnar.
İnsannara deyni onemni, ki yaşamak uuru ilerlesin: pensiyada olannarın pensiyaları üüselsin, işleyän insannar taa çok kazansınnar. Bundan kaarä vatandaşlar isteerlär, ki kuvetlär mediţina uurnda diişmekleri giriştirsinnär, bolniţalarda ii koşulları kursunnar. Komrat kasabasının yaşayannarın bakışlarına görä maasuz bu neetlerin başa çıkarmaa deyni, prezident kuvet koysun lääzım.
«Söläyiniz, netürlü diişmeklär gelän 4 yılın içindä Moldovada olsunnar isteersiniz?»
«Bişey diişmeyecek».
«Bişey islää beklämeeriz. Nicä geçän 4 yıl oldu, bu sıra da hep osoy olcȇk, bana kalsa».
«Bişey bizdä diişmeyecek».
İnsannar söleerlär, ani Prezident en ilkin Moldovanın vatandaşlarını düşünsün lääzım, onnarın iilii için çalışsın, da sadece sora dış politikasını ilerletsin.
«Kim dä olmasa, Prezident en ilkin bizim insannarımızı düşünsün lääzım, da sora kalanını».
«En ilkin devlettä olannar önemni. Nicä biz yaşȇrız. Komuşuların işinä karışmȇȇrız. Eеr yardımımız lääzım, yardım ederiz. Okadar».
«Umut var, ani islää diişmeklär olacȇklar. Halizdän devletimiz zengin. Bizdä hepsi var, sadece becerikli öndericilär olsunnar lääzım. Gençlerimiz burada işlesinnär lääzım. Onnar sa aşırıya giderlär. Elbetki onnar oradan para devletä getirerlär, ama burada işleselär, taa islää olacȇk».
«Yaşamak taa ii olsun. İş islää ödeklän olsun. Mallar ucuzlasınnar. Hepsi pek paalı oldu. Enseyämeeriz artık».
Vatandaşlar urguladılar, ani bekleerlär ii diişmekleri soţial sferasında. Unutlanȇrlar, ani kuvetlär sıradan insannara yardımcı olacȇklar.
«En önemnisi — uşaklarımız evlerinä dönsünnär. Onnara deyni iş erleri burada olsunnar lääzım».
«Moldovanın vatandaşları taa islää koşullarda yaşasınnar lääzım».
«Hepsi hepsindä islää olsun. Paalar uygun olsunnar. Politikacılarımız çekişmesinnär. Usluluk bütün dünnedä olsun».
Gagauz Erin yaşayannarı umutlanȇrlar, ani Moldova ilerleyecek, ani kuvetlär devletin soţial hem ȇkonomika ilerlemesi için lääzımnı olan işleri yapacȇklar.
Avtor: V.Çoban, operator: V.Kıssa, montaj: İ.Rezuneţ