Moldova devletin saalıı korumak ministerlii teklif etti mediţina koşulların paasını üüseltmää. Ministerlik haberledi ki bu karar baalı başka paaların kalkınmasınnan, ölä nicä ilaçların paası, komunal koşulları hem eni tehnologiyaların giriştirilmesi.
Dokumentä bakarak, angısı devletin ofiţial saytında tiparlandı, sölener, ki mediţina koşulların paası üüseldilmedi o vakıtlardan, açan onnar enez kabledildi. Ama bu koşulların bakılması oldu o vakıttan çok taa paalı.
«164 bakılmış tariftan 134 üç katadan üüselecek, ama 30 tarif- üç kattan taa zedä olacek. Barabar bununnan 124 tarif eski koşullara heptän yokoldu, 116-da eni tarif peydalandı», – Ministerliin kararında haberlener.
Bakarak buna, yaşayannar alaşȇrlar şindiki üüsek paalara, angıları mediţina koşullarına var. Onnar paylaşȇrlar, ki bu paaları diil hepsi insan var nasıl ödesin. Yardım olmȇȇr mediţina polisi dä.
«Hepsi koşullar taa paalı oldu. Gipertoniklerä pek zor oldu, paalı ilaçları satın almaa, ki kendini ii durumda tutmaa. Operaţiyalar da pek paalı. Eеr paran yoksaydı, ozaman yaşamaa da zor».
«Şindiki paalar üüsek, ne sölemää, yok nicä enidän kaldırmaa».
Ministerliin uzmannarı haberleerlär, ki mediţina koşulların en üüsek paaları diişmedilär, da kaldılar hep ölä, nicä vardı ileri.
Avtor: L. Novak, operator: V. Kıssa, montaj: A. Topal