Moldovada çiftçi palatalrını kuracȇklar. Busoy kanon proektini hükümet artık imzaladı. Parlament bu kanonu kabledärsä devlettä bir milli on da regional çiftçi palataları kurulacȇk. Onnar Hınçeşt, Foleşt, Edineţ, Orgeev, Ungen, Kaul hem kauşan dolaylarında, Kişinöv hem Belţı kasabalarında hem Gagauz avtonomiyasında olacȇklar. Bu palatalar kurulduktan sora çiftçilerin olacȇk kolaylıkları taa geniştän kendi haklarını korumaa, büüdülän mallarını birliktä satmaa hem başka soruşları çözmäää.
Kanon proektini çiftçi palatalrın kurması hem onnarın iş sırası için Moldovanın çiftçilik ministerlii USAID kurumunun yarımınnan hazırladı. Devlettä bir milli on da regional çiftçi palataları olacȇk. Var olan problemaları taa kolay çözmää deyni, çifçilik uurnun ilerletmää deyni agrariylär kuvetlerini birleştirsinnär lääzım — sölerlär kanon proektinin kurucuları. USAID kurumunun temsilcisi İnna Butuçel açıkladı ani, çifţilär kararlarını kendileri kabledeceklär, devlet hem ministerlik bu işä karışmayacȇk.
«Çiftţilik palatalrını kendileri agrariylär kuracȇklar. Onnar da kararları kabledeceklär. Onnar kendi neetlerini ilerledäbileceklär. Kendi haklarının koruyabileceklär. Hepsi çifçilerin adından Ministerlää, Hükümetä danişabileceklär»,- USAID kurumunun temsilcisi İnna Butuçel açıkladı .
İnna Butuçel açıkladı ani herbir Çiftçilik palatasının kendi öndericilii olcȇk hem kendi nasaatı. Olacȇk kendi büdceti dä. Palatanın azaları kendileri belli edeceklär nesoy hem nereyä paraları harcamaa.
«Palatanın nasaatçıları 4 yıla seçileceklär, kanonda yazılı kuralalra görä»,- İnna Butuçel açıkladı.
Çiftçilik ministerliin başı V.Bolä söledi ani çiftçilik palataları kurulduktan sora ministerliin hem agrariylerin aralarında sıkı baalantılar olacȇklar. Çünkü butakım agrariylär taa kolay kendi problemalarının kuvetlerä işittiräbileceklär.
«Biz isteeriz, ki hepsi çiftçilär yardımı kabletsinnär. Kim 10 ektar, kim 500 ektar, kim 1000 ektar toprak işler hepsinin var hakı yardım kabletmää, subsidiya kabletmää, grant proektlerinä katılmaa»,- Çiftçilik ministerliin başı V.Bolä söledi.
Çifçilik palarasına var nasıl katılsınnar may hepsi çiftçilär. Bunun için şifçi en aaz 2 ekrtar toprak işlesin lääzm. Bu azalara devlet büdcetindän para ödenecek. Agrariylerä dä bu palatların sayısında olmaa deyni para ödemää sıra gelecek. Amma esaba alınacȇk netürlü işi yapȇrlar agrariylär, ne büüderlär, nekadar para yılda kazanȇrlar. Çiftçilik ministerliin başı V.Bolä söledi ani çiftçilär çiftçilin sektorunu bu zor durumdan kurtarmak için kuvetlerini birleştirsinnär lääzım. “Başka türlü başarılı olamayacȇz”, — çizgiledi ministru.
«Sadecä siz kendiniz problemalarınızı bilersiniz. Bunnarı bizä annadasınız lääzım da biz birliktä Evropa Birlinnä danışarım, da onnarın finans yardımı herbirinizä etişsin lääzm»,- V.Bolä söledi .
GHT çiftçilik soruşlarında komissiyasının başı V.Manastırlı çizgiledi, ani avtonomiyanın agrariyleri hazır olacȇklar katılmaa bu palatalara, er görärsalar onnarın faydasını.
«Er bu çifçilik palataları faydalı olarsalar, elbetki, biz kayıl olacȇz buna. Biz isteriz ki çiftçilik ilerlesin. Biz isteriz görmää ani durum ii tarafa dooru diişer. Biz isteeriz herbirnnän işlemää. İsterim büüdülän bereketimizi satmaa. Ko hem Russiyaya hem Ukrainaya hem başka devletlerä mallarımımzı satmaa kolaylıımız olsun»,- GHT çiftçilik soruşlarında komissiyasının başı V.Manastırlı çizgiledi .
Gagauz Erinin çiftçisi İ.Mardar geçennerdä aşırı devletlerdä bulundu, neredä bu çiftçilik palatalarını artyık çok yıl kullanȇrlar. Onun bakışına görä faydası var.
«Eer biz kuvedimizi birleştirärsäk, 3 dolay, nicä plana koyuldu, bizä taa kolay olacȇk. Kendiniz bilersiniz nicä zor tek başına problemaları çözmää. Ya bişey başa çkaramȇrsın ya da kalan işlerini brakım sadecä dokumentlärlän kabinettän kabinedä kaçınȇrsın. Burada sa bizim temsilcimiz olacȇk, o da bizim adımızdan hepsi kurumnarda lafedecek»,- Gagauz Erinin çiftçisi İ.Mardar çizgiledi .
Moldova çiftçi palatalrı için kanon proektini hükümet Parlamentä verecek. Burada deputatlar onu iki okumakta kabletsinnär lääzım.
