Yuniorların arasında Moldova şahmata çempionatı Kişinöv kasabasında geçti. Gagauz Erini 17 sportçu temsil etti.
Yuniorların arasında Moldova şahmata çempionatında Gagauz Erini 17 sportçu temsil etti. Onnar, nicä açıkladı Şahmata-şaşki regional okulu başı İvan Velikoglo, kendilerini üüsek uurda gösterdilär.
«Bu çempiontta pay almaa deyni bir yıl hazırlandık. Kimi uşaklar taa çok hazırlandılar. Beşär, altışar yıl. Her yıl biz bu çempionata katılȇrız. Bu pek önemni bir yarışmak, çünkü burada bizim sportçularımız hem Gagauz Erini, hem dä Moldovayı temsil ederlär»,- açıkladı Şahmata-şaşki regional okulu başı İvan Velikoglo.
Başarılı olmaa deyni sportçular hem dä onnarın terenerleri birliktä işleerlär.
«Çempionat pek islää geçti. Sessiz bir atmosfera kuruldu, nicä lääzım olsun. Elbetki biz dalgalandık. Sıradan bir yarışmak diil. Bu Moldova çempionatı. En iilär taradılar. Bän sayȇrım, ani bän islää kendi becermeklerimi gösterdim. Hepsi şahmatacılara başarılı olsunnar dileerim».
«Çempionata az vakıt kaldıynan terenirovkaların sayısını zeedeletiik. Taa çok vakıt şahmata oynadık, hazırlandık».
«Biz pek islää hazırlandık. Trenerimizlän birliktä hazırlandık, çok partiya geçirdik, türlü variantları denedik. Sayȇrım, ani islää hazırlandık».
«Sevinerim, ani başarılı oldum. Seftä bölä çempionatta pay aldım».
Yuniorların arasında Moldova şahmata çempionatında Gagauz Erini temsil edän 17 sportçunun arasından 5 şahmatacı medalileri kazandılar.
Avtor:V.Çoban, P.Slavova, montaj: M.Kazaku