Komratta çekedecek kendi işini moldo-türk kolecı. Onun açılması için hükümet kayıl oldu Türkiya devletinnän profesional- tehnik üüretmesindä barabar çalışması için protokollan.
Moldo-türk kolecı, angısı Komrat kasabasında bulunȇr olacȇk devlet kurumunnan, angısı işleyecek Moldova devletin kanonnarına görä, söleniler kuvetlerin haberlerindä. Hükümetin oturuşunda üüretmäk ministrusu Dan Perçun nışannadı, ani bunun için imzalandılar hepsi lääzımnı dokumentlär.
«Türkiye hükümetlän protokol profesional- tehnik üüretmäk bölümündä verdi kolaylık türk partnörların yardımınnan Komratta kolecı düzmää. Ondan sora, nicä hükümet uurunda kabledildilär hepsi lääzımnı kararlar üüretmäk kurumu var nasıl 2025-ci yıldan işlemää çeketsin»,- nışannadı Dan Perçun.
Kolecda uşaklar üürenäbileceklär ölä zanaatlarda, nicä informaţion tehnologiyaları, eşektrik hem elektron tehnologiyaları.
«Bu eni yapı, angısının yanında obşejitie bulunȇr, ama üüretmäk rumın, ingliz hem kimi predmetlär türk dilindä olacȇklar. Üüretmäk kurumuna var nasıl gelsinnär hepsi, kim isteer kabletmää üüretmeyi profesional- tehnik uurunda regionda rumın dilindä»,- söledi ministru.
Koyulu plana, ani kolec kendi işini çekedecek 2025-ci yılda. Finans tarafından ona yardım edeceklär Türkiye devleti hem Moldovanın üüretmäk ministerlii.
«Kolecın çalışması için paraların bir payını devlet bücetindän verileceklär. Şükür ederiz Turkiye partnörlarını da savaşacȇz, ki 2025-ci yılda bu üüretmäk kurumu şansora çalışsın»,- ekledi Perçun.
2019-cu yılın sonunda Komratta çekettilär işlär industrial kolecanın düzülmesindä TİKA agenstvosunun finans yardımınnan.
