Komrat merkez bibliotekasında istoriya bilgileri doktorun Diana Nikoglo eni kiyadın prezentaţiyasını geçirdi. Kendi işindä o milletlii gagauz literaturasının yaratmalarında aaraştırdı. Prezentaţiyada bizim çekim grupamız da bulundu.
«Этничность в художественной литературе гагаузов» kiyadı, avtorun Nikoglo Diananın laflarına görä, onun anasına, Nikoglo Neonilaya adalı. Onuştan prezentaţiya da adalıydı anasının anmasına. Neonila Nikoglo bütün yaşamasını bibliotekada çalıştı, kızını da, paylaşȇr avtor, literatura dünnesinnän o tanıştırdı.
«Anam beni literaturaylan tanıştırdı, gagauz literaturasınnan da hep ölä. Uşaklıımdan bilärdim, kim o Karaçoban, Kuroglo, Baboglo. Hepsi resimcileri dä bilärdim, en ilk, kim o Savastin hem Pötr Vlah. Hepsini bilärdim, neçinki anam kultura sferasında çalışardı»,-nışannadı avtor.
«Этничность в художественной литературе гагаузов» kiyadı 2022 yılda tiparlandı, açan avtorun anası taa yaşardı, ama ofiţial prezentaţiyayı kararlandı sade şindi geçirmää. Kiyadın temel tematikası, paylaşȇr Diana Nikoglo, 20 zeedä gagauz avtorların yaratmaların analizi. Nesoy onnar milletlik temasını kendi yazılarında açıklȇȇrlar, ne birleşik hem ne ayırılȇr.
«Ne o milletlik- o gagauzların annaması hem düşünmekleri, ne o vatan, nesoy ana dili için düşünerlär, inan için, dedeleri için. Hepsini bunu yazıcılar kendi yaratmalarında açıklȇȇrlar»,- dedi Diana Nikoglo.
Kendi aklına getirmeklerinnän Nikoglo Diananın anası için hem avtorun bilim işleri için anasının kolegası Evgeniya Lülenova paylaştı.
«Avtor gagauz avtorların yaratmalarına analiz yapȇr, aaraştırȇr te o momentleri, neredä gagauzların milletlii belli ediler»,- nışannadı Lülenova.
«Этничность в художественной литературе гагаузов» kiyadın sayısı 100 ekzemplär kurȇr. Onnarı avtonomiyanın bibliotekalarına daatma plannanȇr.
Avtor: L. Novak,operator: G. Stavilov, montaj: İ.Rezuneţ