Komardın 5-ci uşak başçasında gagauz halkın kultura hem evcimannık Millet köşesi açıldı. Proekt doorudulu kendi halkın varlıını korumaa küçüktän taa.
Gagauz millet köşesi Komradın «Sızıntıcık» uşak başçasının büük salonunda bulunȇr. Küçeräk, ama uygun odacıkta 50 evelki ȇksponattan zeedä bulunȇr. Ȇkspoziţiyaya halk incäzanaat, millet giimneri, evcimannık tertipleri, patretlär girerlär, angıları gagauzların adetlerini hem yaşamasını göstererlär. Muzeydä uşaklar halkın istoriyasını hem kulturasını üürenerlär.
«Вizim muzeydä dorojkalar, fistan, kilim var. Dorojkaları ellän dikärmiştilär. Bu da sandık».
«Açan muzeydä sınışlar, olaylar geçirilerlär, uşaklar kendilerini başka türlü götürerlär»,- dedi üüredici.
Proektin baş neeti- evlad boyunu halkın geçmişinnän, incäzanaatınnan tanıştırmaa. Ȇksponatlarlan tanışarkan, uşaklar kendi halkın gözelliini hem unikallıını üürenerlär.
«Fedi, masa üstündä ne var? Masada çanak var. Sonä, masada ne var? Kaşık».
Proekt üüretmäk programasını tamannȇȇr. Millet köşenin kurmasında, ȇksponatların toplamasında yaslanın çalışannarı, ana-bobalar yardımcı oldular, çizgileer gagauz dili üüredicisi Evdokiya Dragni.
«Bu iki dorojkayı benim anam baaşladı. Sevinerim, ani korumuş onnarı da büün uşak başçasının duvarını donaklȇȇrlar»,- nışannadı üüredici.
Terbiedici, üüredici Mariya Kılçık belli eder, ani muzeyin hepsi ȇksponatları nışannanaceklar.
«Albomu hazırlȇȇrız, neredä hepsi ȇksponatlar erleştirileceklär»,- söledi uşak.
Butakım muzey üüretmäk kurumun uşaklarda kendi halkın adetlerinä, millet kulturasına hatırı korumaa terbieder.
