Valkaneş kasabasının yaşayanı Georgiy Galaţan odundan türlü dekor hem ev tertiplerini yapȇr. Çok yıl üüredici işledi, şindi o halk ustası. Bu zanaatta Georgiy Galaţan 16 yıl çalışȇr. Onun ustacılık yolu hem millet koloriti için haberimiz.
Uşaklar tehnik stanţiyasında Georgiy Galaţan «Büülü odun dünnesi» derneeni götürer. Duvarlarda hem dolapların sergennerindä üüredicinin işleri asılı. Halk ustası pano resimnerini yapȇr, dekorativ donaklarını hem çanakları, magnitları, statuȇtkaları, maketları.
«Bu çorbacılık aulu. O yapıldı Valkaneş kasabasının duum günü için, sergidä gösterdik. İnsanın aulu 19 asirin bitkisi – 20 asirin çeketmesi, açan aylelär taa ço uşaklıydılar hem uşaklar çorbacılıkta yardım edärdilär. Büük ool sulȇȇr hayvannarı, boba da alaflȇȇr. Hepsi da niceydi taa ileri»,- dedi usta.
Georgiy Galaţan odunnan işlemäk zanaatını sever, ustacılaa bütün üreeni koyȇr. Uygun material-flamur aacı.
«Hepsindän pek flamurlan beenerim işlemää. O yımışak material. Dışpıdak aacı taa çetin, onnan da kimär kerä işleerim»,- ekledi o.
Georgiy Galaţanın yaradıcılıında halk kultura , adet simvolikalarını kullanȇr. Onnar var nicä olsunnar ornamentlerdä, angıları halkların koloritindä gözledilerlär. Örnek- gagauz çotrası, angısında halk koloriti özelliklän gözlediler.
«Bizim halkımızda düünä adetçä çotraylan çaarȇrlar. Onu miniatürada yaptım, ki suvenir evdä dä bir kap gibi dä kullanmaa. İçini bal mumunnan hem ketel oloyunnan geçtim, ki akmasın. Çotra «Şarap Yortusu» halk yortumuza uygun»,- nışannadı Galaţan.
Georgiy Galaţan ustacılık becermeklerinnän «Büülü odun dünnesi» derneendä kendi üürenicilerinnän paylaşȇr.
Avtor: S. Dimitroglo, operator: S. Georgiev, montaj: M. Kazaku