Oktäbir ayın 4-dä gagauz politika adamı, Avtonom Teritorial Bölümün Gagauziyanın 1999-2002 yıllarda, Halk Topluşun başkanı, Mihail Kendigelän 83-cü yildünümü tanmannadı. Mihail Kendigelän sayılêr Gagauz Avtonomiyasının kurucularından birisi.
Mihail Kendigelän duudu 1941 yılında oktäbir ayın 4-dä Komrat dolayının Kongaz kasabasında. Üürendi Tiraspol kasabasının Taras Şevçenko adına devlet pedagogika instititunda, işledi rus dili hem literatura üüredicisi, Çok- Maydan küüyün okulunda, sora da okul direktoru. Mihail Kendigelän nışannȇȇr, ani onnarı hazırlardılar, nicä üüredicileri gagauz okulları için.
«Neçin? Neçin ki, açan gagauz dilini çekettilär 1957-ci yılda şkolada götürmää, bizi dä hazırlamaa başladılar, ani büük klaslarda üüretmää rus dilini, bilärkänä gagauz dilini»,- gagauz halkın liderı Mihail Vasilyeviç nışannadı.
1962-ci yıla Mihail Vasilyeviç tanışȇr kendi eşinnän Ada Vasilyevnaylan, angısı geldi küüyä praktikaya.
«Sentäbrinin 15-şindä şkolaya geldim oturȇr orada üç kız şkola sundurmasında. Selämneştik. Bän ozaman taa göz attım. Deerim ya ne gözäl kızlar. Bunnar uçeniţa mı? Ama gördüm, ani diil uçeniţa. O uçitelniţaydı. Orada praktikadaydı. 4-cü kursta. Bir yılına yollandırdılar orayı»,- annattı Kendigelän.
80-ci yılların sonunda Mihail Kendigelän Gagauziya kurulması için akıntısının başındaydı. Türlü yıllarda Gagauziya kanon organın öndercilik postlarında bulunardı. Bütün kendi yaşamasını Mihail Kendigelän kendi halkına izmet etti hem da izmet eder. Bütün kendi yaşamasını üüredärdi kendi kolegalarını hem üürenicileri. Kendi avtonomiyası için o ölä sölärdi:
«Var halklar dünnedä, ani üzlärcä yıl kan dökerlär avtonomiya için, ama avtonomiyayı kazanamȇȇrlar. Ama biz burada, bizim erimizdä, bizim devleti kurduk- Gagauz Eri, Gagauziya. Onuştan lääzım korumaa bu eri. Anmaa te o insannarı, kim taa 88-ci yıldan koydu hepsi kendi fikirini, kendi canını. Çoyu geçindi şansora, ama onnarı biz lääzım analım, zerä o yıllar onnar düşünärdilär pak avtonomiya için, pak gagauz halkı için»,- nışannadı o.
Mihail Vasilyeviç büün da aktiv katılȇr cümnä yaşamasına hem da ilerleder kendi becermeklerinnän paylaşmaa, nışanandı Gagauziya aksakal sovetin başı Vasiliy Arnaut, kutlarkana onu duuma gününnän.
«Mihail Vasilyeviç Kendigelän bizim dostumuz. Biz onu çoktan bileriz, çok yıl birerdä çalışȇrız. O bir büük adam, ani üüreder, gözäl, islää lafları söleer bizä. Da bizdä dä işlär gider. Onun için biz onu kutlȇȇrız bu gününnän, da duva ederiz Allha, versin ona saalık hem yaşamak»,- nışannadı Vasiliy Arnaut.
«Mihail Vasilyeviçin duuma günü büün. Bän isteerim ona saalık, zerä salıını o kaybetti. İsteerim saalık onda olsun. Allaa onun ömürünü uzaltsın hem da hepsi kim onun dolayında onnar da olsunnar saa, da yardım etsinnär biri- birinä yaşamaa uzun bir ömür»,- diledi Gagauziya aksakal sovetin başın yardımcısı Sofya Petrova.
2006-cı yılda Gagauziya başkanı Georgiy Tabunşçik imzaladı karar, angısına görä M. Kendigelänä verildi «Gagauziyanın şannı vatandaşı» adı. Moldova devletin en üüsek ödülünü kabletti Mihail Vasilyeviç «Ordinul Republicii».
Avtor: N.Andrieş, operator: A.Glekov, montaj: A.Gerçu