Bitki 25 yılın içindä doktorların sayısı Moldovada aazaldı 20%.
Moldova ministerliin haberinä görä 43% çalışan doktorlar 55 yaşından taa büük. Mediţina uzmannarı etmeer. Gagauziyada da hep bölä durum, söleer saalık hem soţial koruması bakanı Ȇdgar Dimov: «Dolaylarda etmeer doktorlar. Komratta anasteziolog- reanimatilog, terapevt,oftalmolog,urolog. Çadır-Lunga kasabasında da durum diil pek ii. Etmeer 13 uzman. En zor Valkaneştı kasabasında. Universitetlerin başarannarı küçük dolaylara siirek çalışmaa gelerlär».
Genç uzmannar taa sık sınır aşırı çalışȇrlar. Taa üüsek kazanç paraları, ilerlemäk mediţina hem tehnologiya kolaylıkları. Etmeer doktorlar Komrat Saalık merkezindä dä, söleer merkez başı İrina Todorova: «50 % uzman etmeer, onnarın sırasında 70% pensioner. Aylä doktorlar günün sırasına 3-4 bölümün insannarını bakȇrlar. Onnara pek zor geler çalışmaa».
Bu büük problema Moldovada, angısı getirer diil lääzımnı uurda insannarın ilaçlamasına.
«Uzmannar var. Onnara lääzım yaşamak erleri, ii ay kazanç parası».
«Otoloringolog yok. Gideriz özel klinikaya».
«Benim zorum oldu Kişinöva gitmää. Bizdä lääzım hepsi uzmannar olsunnar».
«Кalp doktorunu bir ay bekleedim.Taa da lääzım bekleeyim».
«İnsan lääzım para ödesin, da özel klinikaya gitsin. Borçlara girerlär, kredit alȇrlar.Yok ne yapmaa.Kişinövda da bölä».
«Bizim aylenin doktoru A. Sandu. İi doktor. Kötü,ani gençlär gelmeerlär bizä. Kızımın drujkası Kişinovda çalışmaa kaldı».
«Etmeer aylä doktoru .Aylan bekleriz. Kazanç paraları az bezbelli.İnsan gider.Bu yaşamak mı?»
2024 cu yılda Parlament insanın saalıkların koruması için kakona diişmekleri geliştirdi, angılarına görä genç uzmannar mediţina uurunda kompensaţiya bücettän kablederlär. 120 binär ley kablederlär liţenziatlar.
«Geçti yıl Gagauziyaya 7 uzman geldi.Herkezi 100 bin ley kompensaţiyadan kaarä kabletti. Bu yıl da verecez.Hepsi genç uzmannara yardımcı olacez»,- söleer saalık hem soţial koruması bakanı Ȇdgar Dimov.
Statistikaya görä, Moldovada 170 aylä doktoru, 115 anesteziolog-reanimatolog, 60 zeydä rentgenolog,50 terpevt, kardiologlar, pediatorlar, hızlı mediţina yardımı doktoru, sudmedekspertlar etmeer.
