Kolaylık medik koşularına — bu o, nedän çekiler milletin saalıı. Kıran ayın 12 — dä bütünnä dünnedä bakılȇr halklararsı günü, angısı baalı saalıı — korumak koşullarınnan. Nekadar kolaylık var bizim yaşayannarda kaliteli mediţina izmetlerini kabletmää, üürendi bizim televizion grupamız.
Medik koşulları Moldova devletindä — bu bir en önemli tema yaşayannarın aralarında. Sıralar bolniţalarda hem da uzmannarın etişmemezlii — bir sıra problema, angılarınnan karşı gelerlär paţientlär bütünnä memlekettä, çizgileerlär yaşayannar.
Da bölä istoriyalar binnärlän. Bölä durumnarın sebeplerin birisi — o, ani etişmer uzman. GRT CK «Диалог в студии» programasının pay alannarı — doktorlar Komrat kasabasından hem da Çadır — Lungadan . Onnar nışannȇrlar, ani kolaylık mediţinaya taa zeedä çekiler ondan, nekadar uzman çalışȇr medik kurumnarında.
«Bän açıktan var nasıl söleyim, ani kolaylık ii mediţina izmetlerini kabletmää var, buna sigorta kompaniyası verer kolaylık»,- dedi Valentina Fileva.
«Bizdä, may herbir yaşamak erindä var fizkabinetlär, laboratoriyalar, neredä hepsi yaşayannar var nasıl bakılsınnar, angılarına lääzımnı ilk mediţina izmetleri»,- Çadır — Lunga kasabasının Saalıı — korumak merkezin başın yardımcısı Mariya Keleş dedi.
20 yıl geeri Moldova devletindä giriştirildi mediţina sigortası, herbir insanda, angıları yaşȇȇrlar Moldovada, lääzım olsun mediţina sigorta polisi. Ona görä, insanın var hakı kabletmää kaliteli mediţina koşullarını.
«Bana deyni kolay.Yardımcı olȇrlar. Açan pristup olȇr, çaarȇrım, gelerlär, yardım ederlär».
Büünkü günnär var çok fukarä insan, angıları ödämeerlär bölä üüsek paraları, angıları bakılı Saalık Ministerliinnän. Pek üüsek paalar, da herbir insan kabledämeer lääzımnı mediţina koşullarını. Vakıtçasına satın almȇȇrlar polisleri.
Yaşayannarın kimi grupaları var nasıl karşı gelsinnär zorluklarlan, kabledärkän mediţina sigorta polislerini. Onnarda yok polis.
«Var fukarä yaşayannar, angılarında hiç bişey yok, yok yaşamak erleri. May alez şindiki zamannarda, açan ayazlar, hem da taa çok başka problemalar var. Bizdä var pek çok problema. Ne primariya, ne da soţial uurunda çalışannar, kimsey bu iştä yardım etmeer. Biz kalȇrız bir — birä hastaylan»,- Komrat dolay bolniţasının başın yardımcısı Konstantin Yanioglo söledi.
Variant gibi, nicä erleştirmää bu hastaları — erleştirmää onnarı Yaşlı insannar evinä, söleer Natalya Popazoglo. Ama buna da gider birkaç afta, kimärsäydi ay da.
Bölä koşullara lääzım olacek harcansın büük paralar , bu ilk. Az kim bu işi yapabilecek parasız, volantör mı. Nicä Evropada, volontörlar gelerlär o Yaşlı insannarın evlerinä, yardım ederlär. Bu taa zor.
Nicä doktorlar söleerlär, sade sistema uurunda diişmeklär dorudabileceklär durumu, angısına görä Moldova devletin yaşayannarın olacek kolaylıkları kabletmää kaliteli mediţina koşullarını.
