Liţey klasları üürenicileri 9-cu klasların başarannarına matematika ekzameninä hazırlanmaa yardım edeceklär. Bu «Matematica de la egal la egal» milli programasına görä yapılȇr. Üürenicilär için maasuz kurslar geçiriler.
«Matematica de la egal la egal» milli programasına görä matematika predmetini pek islää bilän liţey klasların üürenicileri 9-cu klasların üürenicilerinä ekzamenä hazırlanmaa yardım edeceklär. Bu iş üüsek uurda olsun deyni bu üürenicilär için maasuz kurslar geçirilerlär. Bu volontörların birisi Kirsovo küüyü M.Tuzlov adına liţeyi üürenicisi M.Arnaut: «Biz işleyecez o üürenicilärlän, angıların matematika predmetindä zorlukları var. Biz onnara bilgilerini kaavileştirmää yardım edecez».
Mariya Arnaut emin, ani faydalı olabilecek: «Bän beenerim matematikayı. Burada hepsi üzdä bulunȇr. Ya cuvabın dooru, ya diil dooru. Bu diil bir yaratma angısını birkimsey varnasıl beensin, başkası sa beenmesin. Matematikada mutlak dooru cuvabı bulmaa lääzım».
Moldovanın üülen tarafı temsilcileri için kurslar Komratta M.Eminesku adına liţeyindä geçirilerlär.Katılȇr 150 üürenici Gagauz Erindän hem dä Besarabäska, Kaul, Taraklı, Löva, Çimişliya dolaylarından. Volontörlar en ii üürenicilerin sayısından seçildilär. Matematika predmetindä en küöük bal 8,5 kurȇr. herbir okuldan ikişär üürenici katılȇr. Onnar 10-cu hem 11-ci klaslardan. Ama M.Eminesku adına liţeyini 12-ci klasların üürenicileri temsil ederlär. Onnar alındılar bu iştän bakmayarak ona, ani kendi ekzamennerinä katılȇrlar.
«Bu üürenicilär gumanitar profilindä üürenerlär. Onnar kendileri dä bakalavra ekzamennerindä matematikayı vermää seçtilär. Bu üürenicilerimiz pek islää üürenerlär»,- dedi Svetlana Stoynova, M.Eminesku adına liţeyi başı.
Üüretim ministerlii haberledi ani 9-cu klas için matematika ekzameni özel kuralalra görä geçirilecek. Bu üzerä başarannar cuvaplı olsunnar lääzım. Da iicä bu ekzamenä hazırlansınnar .
«Kursların programası pek uygun kurulu. Sayȇrım, ani volontärlar gimnaziya başarannarına yardımcı olabileceklär. Görerim, ani onnar pek isterlär faydalı olmaa hem dä, ani bu iştän havezlän alındılar»,- nışannadı Tatyana Larionova, V.Moşkov adına liţeyi üüredicisi.
Üüredicilär sölerlär, ani «Matematica de la egal la egal» milli programası gimnaziyaları başarannar için faydalı olacȇk. Bundan kaarä volontärlar kendi liderlik kalitelerini gösteräbileceklär hem dä üürediciliktä kendilerini deneyeceklär.
