Komradın 6-cı uşak başçasında « Mărțıșor-2025» festivali geçti. Olayda kasabanın 8 uşak başçası pay aldı. Yortuda Svetlana Dimitroglo bulundu.
Şiirlär, oyunnar, türkülär, şıralı millet giimneri «Mărțıșor» ilkyaz yortusunun donakları oldular. Olay pak devlet dilindä geçirildi.
«Bizim devletin millet yortularını, onnarın adetlerini uşaklarımıza göstereriz hem savaşȇrız yaşatmaa»,- dedi üüredici.
«Mărțıșor-2025» festivali Komradın 8 uşak başçasını birleştirdi. Pay alannarın oldu kolaylıı moldovan kulturasına daalmaa. Yortulu olay adetä görä geçti, Gagauziyanın kurumnarında o ikinci yıl geçiriler, belli etti Üüretmäk bakannıın baş uzmanı Lidiya Ostaş : «Вu yıl Mȇrţişora adalı festivallär Kıpçaan, Kazayak küüyün uşak başçalarında geçtilär. Şindi Komradın 8-ci yaslasında geçiriler. 8 yasla festivalä katıldı. Uşaklar meraklı nomerleri gösterdilär: türküleri çaldılar, oyunnarı oynadılar».
Yortuda şen-şen türkülär öttülär, uşaklar moldovan millet oyunnarını oynadılar. İlkyazın simvolu Mȇrţişor salonun her erindä gözelleşärdi. Simvol, angısı başarlıı hem sevinmelii getirer. Festivali hazırlamaa hem geçirmää yardım etti üüredicilär, analar-bobalar, belli etti Komradın 6-cı uşak başçası başı Olga Mihaylova: «Bu bizim milletin halk kulturasının payı, bunsuz geleceemiz yok. Bunun için uşak başçasından uşaklara sevgiyi halk adetlerinä terbiederiz. Biz bir türkü hem bir oyun gösterdik».
Festival uşakları kultura varlıınnan tanıştırdı. Hepsi katılannara şıralı duyguları hem ilkyaz havezini baaşladı!
Moldovanın hem Gagauziyanın en mekalı haberleri GRTnın Telegram kanalında!