«En ii terbiedici-2025» regional yarışmanın sınırlarında Valkaneş kasabasının 7-ci uşak başçasında geçirildi açık ders. Onu geçirdi Çeşmä küüyündän terbi edici Mariya Garçeva. Burada bulundular Gagauziya başkanı Evgeniya Guţul hem üüretmäk bakanı Natalya Kristeva.
Valkaneş kasabasının 7-ci uşak başçasının var kendi özellii — burada uşaklar üürenerlär rus hem devlet dillerindä. Hep ölä da herbir grupa üürener gagauz dilini dä, ne yardım eder korumaa kulturayı hem adetleri. Açık dersi kuşlar için hazırlamak grupasında geçirdi Mariya Garçeva. O nışannadı, ani taa pek dalgalıydı işlemää yabancı yaslada, hem Avtonomiya başları bulunarak derstä.
«Konkursta pay alêrım ilk sefer, sanêrım, ani bu da bir başarlı basamak. Konkursta pay alarkana, biz göstereriz kendimizi terbiedici olarak, kaavileştireriz kendi bilgilerimizi»,- dedi Mariya.
Mariya Garçeva kullandı türlü pedagogika metodlarını. Hazırlamıştı türlü meraklı daavaları uşaklar için, dedi üüretmäk bakannıın baş uzmanı Lidiya Ostaş: «Biz gördük, nicä üüredici hazırladı gözäl materialları hem da geçirdi çok gözäl meraklı bir zanaat uşaklarlan. O gösterdi kendi becermeklerini, savaştı uşaklarda da ilerletmää onnarın bilgilerini».
Üüretmäk bakannıın başı Nataliya Kristeva nışannadı, ani bu yıl çok pay alıcı var «En ii terbiedici hem üüredici» regional konkursunda.
«Bu konkurs, angısı açêr bizim üüredicilerin becermeklerini, gösterer, nesoy onnar kendilerini götürerlär zor durumda, burada vardı zor durum — tehnika biraz çalışmadı, ama gördük, ani terbiedici kantarladı o işi da ilerletti dersi. Şükür ederiz hepsi pay alannarı, bu verer kolaylık onnara taa üüsek uura kalkmaa, üürenmää nesä eni. Pek önemni, ani başkan da bulundu da gördü bu açık dersi»,- Kristeva nışannadı.
Başkan Evgeniya Guţul şükür etti terbiedicileri hem yaslanın hepsi çalışannarını onnarın dayanmasĩ için hem büük sevgisi için kendi işinä. O nışannadı, ani kaliteli üüretmäk proţesi pek önemni insanın yaşamasında. Uşaklara deyni da üürenmäk lääzım olsun meraklı hem faydalı.
