Geçän Olimpiyada oyunnarında Parij kasabasında aar atletların arasında Moldovadan Marin Robu bulundu, angısı bizim devletimizi temsil edärdi 89 kila aralık kategoriyasında. Sporçu gösterdi kendi kuvedini, dayanıklıını, zor denemekleri geçirip. Nicä geçtilär Olimpiada oyunnarı, nesoy zorlukları o geçirdi anandȇer Natalya Andrieş.
Moldovadan aar atlet Marin Robu paylaştı kendi duygularınnan aarlık kategoriyalar için. O annattı, ani dieta tutması, trenirovkalar oldular onun yaşamasının payınnan. «Bu diildi ilin, ama bän annardım, ani hepsi zaametlär gösterileceklär yarışmalarda»,- nışannadı o.
«Bän üürendim, ani Olimpiada oyunnarında bän lääzımdı ayırayım 89 hem 73 kilaların aralarında, neçin ki bu olimpiada kategoriyaları. Bunun için kendi kilalarıma lääzımdı taa koyayım. Olimpiada oyunnarından Tokioda, Olimpiada oyunnarınadan Parijda 3 yıl geçti da bu vakıdın içindä lääzımdı 20 kila alayım. Bunu hızlı yaptım, ama aaz vakıt vardı bukadar kilalarlan hazırlanmaa. Ama bän kendi çıkışlarıma sevinerim. Var nicä taa islää olsun, ama çıkış ii oldu»,- ekledi sportçu.
Marin Robu hep ölä paylaştı kendi plannarınnan Olimpiada oyunnarından sora. O annattı, ne yapȇr, neya hazırlanȇr hem ne isteer diiştirmää kendi hazırlanmak programasında, ki taa ii çıkışları kazanmaa.
«Şindiki vakıt çekettim trenirovkaları geçirmää. Dekabr ayında geçecek seniorlar arasında dünnä çempionatı Bahreyn devletindä. Bän hazırlanȇrım, ki revanş almaa Olimpiada oyunnarın konkurentlarından, ama diil bu önemni. Bana deyni önemni o, ani gelän Olimpiada oyunnarı Los- Anjelesta, bän yapacam hepsini, ki taa islää hazır olayım onnara»,- çizgiledi Olimpiada oyunnarın pay alanı.
Marin Robu 89 kila aarlık kategoriyasında 4-cü eri kazandı da sayıya koydu bütün çıkışı — 383 kila. Bu Olimpiada oyunnarı ona deyni ikinci oldular. Geçän oyunnarda Tokioda o 8-ci eri kazandıydı.
Avtror: N.Andrieş, operator: V.Kıssa, montaj: A.Topal