Haydar küüyündä Moldova Respublikasının Ekologiya Fondun yardımınnan, giriştiriler proekt «Lunguţa» derenin paklaması için hem derinnetmesi için. Proektin önemnii için Haydar küüyünä deyni, annadȇr bizim korrespondentımız Oleg Duloglo.
Haydar küüyün «Lunguţa» derenin paklaması hem derinnetmesi için işlär, geçirilmedi 80-ci yıllardan. Bitki yılların içindä, çok işlär yapıldı, ki olsun kolaylık başlamaa bu proekti, annattı Haydar küüyün primarı İlya Kiosä.
« Biz 2018-ci yılda, aaradık, yaptık proekti. 2018-ci yıldan bu yıladan biz aaradık para, ani çekettirmää deyni bu proekti. İsteerim, çok saa ol sölemää Ekologiyä Fonduna, ani verdilär bizä para»,- nışannadı primar.
Haydar küüyündä «Lunguţa» deresi 10 kilometraya yakın paklanacȇk hem derinnidilecek . Bu iş yardım edecek çözmää problemaları, angılarınnan Haydar küüyün yaşayannarı karşı gelärdilär çok yılların süresindä, nışannadı İlya Kiosä.
«Bu proekttän biz bekleeriz, ani dolacȇk derelär suylan, ekologiyamız doorulacȇk, biräz fidan dikecez, hayvannarı olacȇk, neredä sulamaa. Bizim küüyüda büük yaamurlarda dolduramayacȇk, neçin deyni pek büük problema, ani insannarın aulları dolȇr, var içerlerinä girdii, maazalarına girdii. Biz düşüneriz, ani hepsi islä olacȇk, da ötää doru doldurmayacȇk suylan bizim küüyü»,-çizgiledi İlyä Kiosä.
Bütün proektin paası Haydar küüyün «Lunguţa» derenin paklaması için hem derinnetmesi için, tutȇr 6 million leydän biräz zeedä. Nica nışannadı küüyün primarı, İlya Kiosä, proekt lääzım başarılsın üç yılın süresindä, ama işlerin zeedesi yapılacȇk bu yılın süresindä. Var erli kuvetlerin plannarında, derenin dolayınnı da gözelletmää.
Аvtor: О. Duloglo, оpertor hem montaj: L. Аrfanos