Avdarma küüyün hem Komrat kasabasının «Antares» sport okulun tenis klubun sportçuları katılȇrlar Moldova tenis çempionatına . Gagauziyanın sportçuları girdilär liderlerin arasına. İlerdä yarışmaların bitki turu, da ona uşaklar hazırlanȇrlar.
Avdarma küüyün hem Komrat kasabasının “Antares” sport okulun tenis klubun sportçuları bu yazın katıldılar yarışmaklara Bulgsariyada hem Rumıniyada. Bu yarışmakların enseyicileri girdilär Evropanın en ii tenisistlerin listesinä. Kimi sportçular çempionatlarda hem turnirlerdä, angıları devletin içäändä geçerlär, oldular çempion hem girdilär Moldova komandasına Evropa çempionatına katılmaa deyni. Nicä nışanandı trener Nikolay Melintiy onun terbiedenneri şansora bir uurda durȇrlar devletin anılmış tenisistlerin aralarında da var nasıl konkurenţiya yapsınnar yabancı klublardan sportçulara.
«Bu yıl ikinci turda çocuklar birinci eri aldılar. Genç İgor Kasım ensedi büükleri da kendi yaşlarına görä pek islää çıkışları gösterdi. Bizdä çok becerekli hem talantlı uşak var»,-dedi trener.
Trener Anna Melintiy nışanandı, ani en ilkin onnar üürederlär uşakları sevsinnär tenisi, ama sora söleerlär çıkışlar için. Herbir yarışmaktan sora açıklȇȇrlar yannışlıkları.
«Hepsi uşaklar trenirovkalarda büük sevgiylän hem havezlän işleerlär, da şindi biz çok zaamet koymȇȇrız, ki onnar bunu yapsınnar, onnarı diil lääızm zorlan koymaa. Onnar kendileri bunu isteerlär yapmaa hem kimär keret taa da zeedä bizdän isteerlär»,- söledi Anna.
Komratta masa tenisin bölümünä 20 uşak gezer. Nicä nışannandı trener Nikolay Melintiy sade barabar analarlan- bobalarlan hem trenerlarlan var nasıl ii çıkışları kazansınnar. Önemni hergünkü trenirovkalar da , günün rejimi, imek, urgulȇȇr Nikolay Melintiy.
«Eer ana- boba uşaan nazlıını tutturarsaydı, açan o söleer, ani istämeer, yapmayacek hem o üşener, ozaman bişey olmayacek. Nesoy da uşak islää yada talantlı olmarsa, bir trener bişey yapmayacek. Bunun için danışȇrım analara- bobalara düşününnär, eer uşak talantlı, sizin yardımınızlan o bayırları deverecek, ama trenerlarlan barabar çempion olacek»,- ekledi Nikolay.
Barabar becerekli tenisistlärlän klubta zanaatlanȇrlar gençlär dä, angıları kablederlär bilgileri. Nicä nışannadılar sportçular bu yıl onnara deyni başarılıydı, neçin ki çoyu ii çıkışları kazandılar reytingın kaldırması için.
«Bu yıl gittim Evropa çempionatına Rumıniyaya Buharesta. Oynadım islää. Hep ölä Bulgariyaya gittim dünnäarası yarışmaklara. Franţiyada Strasburgta bulundum. Orayı birkaç yıl giderim. Bu yılı pek beendim, neçinki çok erä gidäbildim, bunun için çok zanaatlandım».
«Bän Balkan oyunnarına gittim iyün ayında. Oynadım büüklär için. Bu pek önemni hem zor turnirdi, neçinki ilk keret komanda için oynadım, benim üstümdä cuvapçılık vardı. Biz üçüncü eri aldık».
«Çok turnir vardı, angılarına bän katıldım, ama bu yıl başarılıydı diil sade bendä, ama komandada da. Biz çok er kazandık dünnäarası hem Respublika turnirlerdä. Bnitki turnirdä bizim komandamız, angısına girdilär Lozov Dmitriy, Kasım İgor hem Kozman David. İlk eri komandolar arasında aldık».
« Biz iki tur oynadık da ilk eri aldık. Bizim komandamızda oynadık bän, Kasım İgor hem Kozman David. Annaşmak olsun lääzm, onsuz oynayamacan hem da bal kazanmayacan».
En genç sportçular söleerlär, ani şansora kullanȇrlar topu hem raketkayı da isteerlär çempion olmaa.
«Masa tenisini severim, severim topu hem raketkayı kullanmaa».
Masa tenisi olimpiada sport çeşiti. Da nicä urguladılar uşaklar, bu verer onnara havez gitmää ileri başarlara.
